O`qishni k`ochirish va tiklash

Oʻqishini koʻchirishni istaydigan talabalardan joriy yilda 15-iyuldan 5-avgustga qadar, qayerdan oʻqishni koʻchirayotganiga qarab 2 ta sayt orqali arizalar qabul qilinmoqda. Bular:

1️⃣ Oʻzbekistondagi bir davlat OTMidan boshqa davlat OTMiga yoki bir OTM ichida – transfer.edu.uz sayti orqali (Oliy va oʻrta maxsus taʼlim vazirligi);

2️⃣ xorijiy davlatlardan yoki Oʻzbekistondagi nodavlat OTMlardan – transfer.dtm.uz sayti orqali (Davlat test markazi).

Quyidagi hujjatlar asosida roʻyxatdan oʻtiladi:
– ariza (online toʻldiriladi)
– reyting daftarchasi yoki akademik maʼlumotnoma yoxud transkript nusxasi (bittasi boʻlsa kifoya);
– pasport nusxasi.

 

OʻZBEKISTON RESPUBLIKASI PREZIDENTINING 22-IYUN 2021-YILDAGI PQ-5157 SONLI QARORINING 7 BANDI

2021-yil 15-iyuldan boshlab talabalar oʻqishini koʻchirishning quyidagi tartibi joriy qilinsin, unga muvofiq:

a) talabalar oʻqishini xorijiy mamlakatlarda faoliyat yuritayotgan (shu jumladan, xalqaro tan olingan reytinglarda birinchi 1 000 ta oʻrindan birini egallagan) oliy taʼlim tashkilotlaridan Oʻzbekiston Respublikasi davlat oliy taʼlim muassasalarining mos va turdosh taʼlim yoʻnalishlariga koʻchirishda:

talabadan alohida iqtidor talab etiladigan taʼlim yoʻnalishlari boʻyicha kasbiy (ijodiy) imtihonlar, boshqa taʼlim yoʻnalishlari boʻyicha test sinovlari oʻtkaziladi. Bunda, kasbiy (ijodiy) imtihonlar tegishli oliy taʼlim muassasasi tomonidan, test sinovlari Davlat test markazi tomonidan oʻtkaziladi;

test sinovlari va kasbiy (ijodiy) imtihonlar boʻyicha oʻtish ballari joriy yil 25-iyulga qadar, keyinchalik har yili 15-iyulga qadar Oliy va oʻrta maxsus taʼlim vazirligi hamda tizimida oliy taʼlim muassasalari boʻlgan vazirlik va idoralar tomonidan belgilanadi hamda ommaviy axborot vositalarida eʼlon qilinadi;

oʻtish balidan past ball toʻplagan talabalar bakalavriatga qabul qilishdagi tartibga muvofiq tabaqalashtirilgan toʻlov-kontrakt asosida oʻqishga qabul qilinadi;

test sinovlari va kasbiy (ijodiy) imtihonlar natijalari Davlat test markazi hamda oliy taʼlim muassasalarining rasmiy veb-saytlarida eʼlon qilinadi;

b) talabalar oʻqishini xorijiy mamlakatlarda faoliyat yuritayotgan oliy taʼlim tashkilotlaridan Oʻzbekiston Respublikasi davlat oliy taʼlim muassasalarining mos va turdosh boʻlmagan taʼlim yoʻnalishlariga koʻchirishga ruxsat etilmaydi;

v) talabalar oʻqishini Oʻzbekiston Respublikasining bir hududida joylashgan davlat oliy taʼlim muassasasidan boshqa hududidagi davlat oliy taʼlim muassasasiga koʻchirishda:

oʻqishni mos va turdosh taʼlim yoʻnalishlariga koʻchirishga uzrli sabablar mavjud boʻlganda ruxsat etiladi. Bunda, oʻqishni koʻchirish soʻralayotgan hududda mos va turdosh taʼlim yoʻnalishi mavjud boʻlmaganda, oʻqishni mazkur hududdagi oliy taʼlim muassasasining boshqa taʼlim yoʻnalishiga koʻchirishga ruxsat etiladi;

talabaning respublika bir hududidan ikkinchi hududiga doimiy yashash uchun koʻchib oʻtishi, turmush oʻrtogʻi yoki ota-onasining mehnat faoliyatini amalga oshirish joyi boshqa hududga oʻzgartirilishi, nikoh tuzgandan keyin turmush oʻrtogʻi doimiy yashaydigan hududga koʻchib oʻtishi uzrli sabablar etib tan olinadi;

talabalarning oʻqishini uzrli sabablar mavjud boʻlmagan holatlarda, shuningdek, mos va turdosh boʻlmagan taʼlim yoʻnalishlariga koʻchirish oʻrnatilgan tartibda, tegishli bakalavriat taʼlim yoʻnalishi uchun belgilangan tabaqalashtirilgan toʻlov-kontraktning minimal miqdoriga teng boʻlgan bir martalik toʻlov asosida amalga oshiriladi (mazkur kichik bandning ikkinchi xat boshisida koʻrsatilgan holatlar bundan mustasno);

g) talabalar oʻqishini Oʻzbekiston Respublikasida faoliyat yuritayotgan filiallar va nodavlat oliy taʼlim tashkilotlaridan:

Oʻzbekiston Respublikasi davlat oliy taʼlim muassasalarining mos va turdosh taʼlim yoʻnalishlariga koʻchirish mazkur bandning “a” kichik bandida nazarda tutilgan tartibda;

Oʻzbekiston Respublikasi davlat oliy taʼlim muassasalarining mos va turdosh boʻlmagan taʼlim yoʻnalishlariga koʻchirish oʻrnatilgan tartibda, tegishli bakalavriat taʼlim yoʻnalishi uchun belgilangan tabaqalashtirilgan toʻlov-kontraktning minimal miqdoriga teng boʻlgan bir martalik toʻlov asosida amalga oshiriladi;

d) sport musobaqalari gʻolibi sifatida imtiyoz bilan oliy taʼlim muassasalariga davlat granti asosida oʻqishga qabul qilingan hamda kunduzgi taʼlim shaklida tahsil olayotgan talabalarning oʻqishini ularning arizalariga muvofiq, sirtqi taʼlim shaklidagi mos va turdosh taʼlim yoʻnalishiga (sirtqi taʼlim shakli mavjud boʻlgan taqdirda) davlat granti asosida koʻchirishga ruxsat beriladi.