sss
Navoiyning bebaho va barhayot ijodiy merosi

Joriy yilning 7 fevral kuni Jizzax davlat pedagogika instituti axborot-resurs markazining majlislar zalida Respublika ma’naviyat va ma’rifat markazi Jizzax viloyat bo‘limi, Jizzax harbiy garnizoni ma’naviyat va ma’rifat markazi hamkorligida buyuk mutafakkkir Mir Alisher Navoiy tavalludining 578 yilligi munosabati bilan “Alisher Navoiy –buyuk mutafakkir va davlat arbobi” mavzusida ma’naviy-ma’rifiy tadbir tashkil etildi. Tadbirda  Respublika ma’naviyat va ma’rifat markazi Jizzax viloyat bo‘limi, Jizzax harbiy garnizoni ma’naviyat va ma’rifat markazi, institut axborot-resurs markazi xodimlari va viloyat OAV xodimlari, viloyat musiqali drama teatri vakillari hamda faol kitobxonlar ishtirok etdi.

       Tadbirni viloyat hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari B. To‘xtamishev kirish so‘zi bilan ochib: “Ulug‘ o‘zbek shoiri va mutafakkiri A. Navoiy butun umri davomida adab ahliga rahmano va homiylik qilib kelganligi bilan o‘rta asr o‘zbek va fors-tojik adabiyotida, madaniy hayotida chuqur iz qoldirgan”, -deya ta’kidladi.

 

    So‘ngra, Markaziy harbiy okrug qo‘shinlari qo‘mondonining tarbiyaviy va mafkuraviy ishlar bo‘yicha o‘rinbosari, polkovnik U. Do‘smatov so‘zga chiqib: “A.Navoiyning bebaho va barhayot ijodiy merosi, badiiy tafakkur durdonalari asrlar osha e’tiborli e’zoz olib kelmoqda. Mustaqillikka erishgach, barcha ulug‘ allomalarimiz qatori hazrat ijodi va hayotini o‘rganishga bo‘lgan e’tibor yanada ortdi. Shoir tavalludining 578 yilligiga bag‘ishlab joylarda o‘tkazilayotgan ma’naviy-ma’rifiy tadbirlar  yana bir karra o‘z e’tirofini topmoqda” deya fikr bildirdi.

           Tadbirda O‘zbek tili va adabiyoti fakulteti o‘qituvchisi, dotsenti U.Qosimov  ma’ruza qildi. U o‘z ma’ruzasida: “Navoiy  buyuk shoir va mutafakkir zot. Bu haqiqat quyoshday barchaga ayon. Quyoshning ta’rifini takrorlayverish esa shart emas. Ammo ana shu buyuklik qudrati  har bir asarda namoyon bo‘lishini tahlil qilib ko‘rsatish, ma’nolar jilosini anglash va undan huzurlanish, albatta foydalidir”,-dedi.

       Tadbirda JDPI  ARM xodimlari tomonidan tayyorlangan “She’riyat mulkining sultoni” mavzusidagi adabiyotlar ko‘rgazmasi namoyish etildi. Mazkur ko‘rgazmaga qo‘yilgan adabiyotlarni ARM xodimasi   M. Bobonazarova qisqacha sharhlab  berdi.

 Tadbir so‘ngida  Jizzax harbiy garnizoni kursantlari va viloyat musiqali drama teatri vakillari mavzuga doir adabiy-musiqiy chiqishlarini namoyish etdilar.