sss
13-noyabr – Xalqaro ko’zi ojizlar kuni

NURGA TALPINGAN KO’ZLAR
Ko’zlar borki, nurga talpingusi, yorug’lik shaydosidir, biroq ko’zlar nurga mushtoq bo’lsa-chi, unda qalb ko’zlarini nurga shaydo etadi. Oramizda ko’z nurlari qalb nuriga aylangan insonlar bor,

bunday insonlarni imkoniyati cheklangan insonlar deb ataymiz, biroq imkoniyati cheklangan bo’lsa-da, jismoniy imkoniyati doirasida ular ham kasb-hunar egallashga qodir ekanini ko’rsata oladilar, ma’naviy jihatdan kitobxon bo’lib nurga-ziyoga talpinadilar, Ko’zi ojiz hamyurtlarimizga va bolalarga kutubxonalar tashkil etishni yo’lga qo’yilganligi davlatimiz tomonidan ko’rsatilayotgan g’amxo’rlikning, e’tiborning yana bir namunasidir. O’zbekiston Respublikasi Vazirlar Mahkamasining «Nogironligi bo’lgan shaxslarga axborot-kutubxona xizmati ko’rsatish tizimini takomillashtirish to’g’risida»gi 2018-yil 18-sentabrdagi 739-sonli qarori ijrosini ta’minlash hamda 13-noyabr – XALQARO KO’ZI OJIZLAR KUNI munosabati bilan Jizzax viloyat ko’zi ojizlar kutubxonasi xodimlari «Nurga talpingan ko’zlar» mavzusida ma’naviy-ma’rifiy tadbir tashkil etdi. Mazkur tadbirda kutubxona xodimlari, maktab-internat o’qituvchi va murabbiylari, kutubxonaning faol va faxriy kitobxonlari tashrif buyurib, ayyom bilan barcha nurga oshno qalblarni bugungi ayyomlari bilan qutladilar.

Shu jumladan, JDPI O’zbek tili va adabiyoti fakulteti O’zbek adabiyoti o’qitish metodikasi kafedrasi jamoasidan dotsent S. Eshonqulova va D, Salimova ham so’z olib, kutubxona rahbariyati va xodimlarini «Xalqaro ko’zi ojizlar kuni» bilan tabriklab, kutubxonaning asosiy kitobxonlari sanalgan maktab-internati o’quvchilariga o’zlarining sovg’a-salomlarini topshirdilar. Tadbirni tashkil etgan tashkilotchilarga minnatdorchilik bildirib, kelgusi faoliyatlariga ulkan omadlar tiladilar. Shuningdek, maktab-internat o’quvchilari tomonidan yangragan jonli qo’shiq, raqs va badiiy o’qishlar tadbir shukuhini ko’tardi. Nazarimizda, tashrif biyurgan har bir tomoshabin qalbida mehrga va nurga talpingan insonlarga faqat yaxshilik, ezgulik ulashish orqali ko’ngillar ham yaxshilik sari talpinishi qanchalar muhim ekanini his etdilar, deya olamiz. Tadbirda faol ishtirok etgan ishtirokchilarga va kafedra jamoasi vakillariga tashakkurnomalar taqdim etildi.
Tadbir ko’tarinki ruhda yakunlandi.
Dilnavoz Salimova