Жиззах давлат педагогика институти ректорининг коррупциядан ҳоли олий таълим муассасаси лойиҳасини амалга ошириш юзасидан МУРОЖААТНОМАСИ

Бой қадимий тарихи, унутилмас анъаналари ва қадриятларига эга бўлган мамлакатимиз бугун ривожланишининг янги босқичига чиқди.  Ушбу босқичда таълим тизимининг ўрни беқиёсдир.

Давлат раҳбарининг улкан саъй-ҳаракатлари билан таълим тизими, шу жумладан олий таълим тизими бошқа соҳалар каби ривожланишнинг янги даврини бошидан кечирмоқда ва муҳим ислоҳотлар амалга оширилмоқда. Олий таълим муассасаларининг моддий-техника базаси тобора мустаҳкамланиб, таълим сифатини ошириш мақсадида ўқув адабиётларининг янги авлодлари яратилмоқда. Институт илмий потенциалини ошириш, ноёб ишланмаларни патентлаштириш ҳамда ишлаб чиқаришга жорий этиш асосий вазифага айланиб бормоқда.

Сўнгги йилларда олий таълим тизимида олиб борилаётган ислоҳотларга қарамасдан, коррупция ботқоғига ботиш, таъмагирлик ва бошқа иллатларни касб қилиб олган профессор-ўқитувчилар ва ходимлар топилмоқда.

Жамиятимизда мазкур иллатга қарши тизимли равишда курашиш мақсадида  Ўзбекистон Президентининг «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги фармонига мувофиқ, Коррупцияга қарши курашиш агентлиги ташкил этилди. Агентлик коррупцияга оид, биринчи навбатда, Ўзбекистоннинг миллий манфаатларига ва халқаро имиджига зарар етказувчи жиноятларни тергов қилиш натижаларини комплекс таҳлил қилади.

Олий таълим соҳаларида Коррупциясиз соҳа лойиҳасини амалга оширишни ташкил этиш, 2020 йил 1 апрелдан бошлаб лойиҳани бошқа соҳаларга ҳам босқичма-босқич жорий этиш белгилаб қўйилган эди. Ўтган давр мобайнида таълимни коруппциоген иллатлардан ҳоли қилиш бўйича ташкилий ишлар амалга оширилди.

Олий таълим тизимида фаолият юритаётган ходимларнинг ойлик маошларини сўнгги бир йил ичида 3 маротаба ошириш бўйича қарорлар қабул қилингани, илмий фаолият билан шуғулланаётган ходимларни қўшимча устамалар билан таъминланаётганлигига жавобан халқимизга садоқат, фидоийлик, ташаббус кўрсатиб ва ҳалоллик билан хизмат қилиш фурсати аллақачон етганлигини бугун биз – Жиззах давлат педагогика институтида меҳнат қилаётган ҳар бир раҳбар-ходим ва профессор-ўқитувчилар жуда яхши англаб турибмиз.

Жиззах давлат педагогика институти жамоасининг ҳар бир аъзоси – у ректор бўладими, проректор, декан, бўлим бошлиғи, кафедра мудири,  профессор-ўқитувчи бўладими – биз барчамиз институтда ўқув, ўқув-услубий, илмий ва маънавий-маърифий ишларни замон талаблари даражасида ташкил қилиш, ёшларга етарли шароитларни яратиб бериш, уларнинг инновацион ғоялари, ишланмалари, стартаплари ва бошқа соҳалардаги улкан  истеъдодларини юзага чиқариш ҳамда намоён этишлари учун барча куч ва ғайратимизни сафарбар қиламиз.

Коррупцияга қарши аёвсиз курашни қабул жараёнларидан бошлаб, талабалар ўқишини биринчи курсдан то охирги курсига қадар барча фанларни ўзлаштириш, курс иши, битирув малакавий иши ва магистрлик диссертацияларини ҳимоя қилиш, олий таълимдан кейинги таълимда ҳам бирдек ташкил этамиз.

Институтни илм, маърифат масканига айлантириш йўлида барча ҳамкор ташкилотлар, жамоатчилик ва ҳуқуқни муҳофаза қилувчи идоралар билан биргаликда ҳаракат қиламиз. Бу йўлда талаба-ёшларимиз, профессор-ўқитувчиларимиз – жамоамизнинг ҳар бир аъзоси бизга энг катта кўмакчи бўлишига ишонамиз.

Коррупциянинг ҳар қандай кўринишларини содир этган институт жамоаси аъзоси – у ким ва қайси лавозимда ишлашидан қатъий назар, унга нисбатан “Қонун устувор – жазо муқаррар”лиги таъминланади.

Меҳнатсевар жамоамизнинг биргаликдаги саъй – ҳаракатлари натижасида биз албатта сўзимизнинг устидан чиқамиз.

Азиз ёшлар ва ота-оналар!

Институтнинг қабул жараёнларида ёки ўзингизнинг ва фарзандларингизнинг таълим олишининг барча босқичларида турли найранг ва фирибгарликлар қурбонига ёки  аъзосига айланиб қолманг. Ҳеч қачон сабабсиз оқибат бўлмаслигини ёддан чиқарманг. Фақат ва фақат ёшларнинг  билимига ишонинг ва шунга таянинг. Чунки бугун ўз йўлини мустақил танлай оладиган, касбини ҳурмат билан  муносабатда бўладиган кадрларни тайёрлаш ҳар биримизнинг асосий вазифамизга айланмоғи керак. Бу йўлда Сиз азизлар фарзандларимизни ёлғон муносабатлар қурбонига айлантирманг. Бугун сифатли кадрни таълим муассасасига қабул қилиниши юрт истиқболини белгилашини унутманг.

Коррупция ва таъмагирлик каби жирканч иллатларга қарши курашда қисқа муддатларда самарали натижага эришиб, бошқа соҳаларга ўрнак бўлайлик. Чунки, зиёлилар жамиятни олдинга етакловчи асосий куч саналади. Чунки педагоглар жамиятимиз йўриқчиларидир, улар орқали ёш авлодни эртасини қурамиз.

Биз Сизга ваъда берамиз таъмагирлик ва коррупция иллатларини бўлмаслигига, Сиз бизга кўмакчи бўлинг!

 

Жиззах давлат педагогика институти ректори

 Ш.С.Шарипов