Sirtqi ta‘lim. – Онлайн савол-жавоб

O‘z.R. Vazirlar Mahkamasining 2017 yil 21 noyabrdagi 930-son qarori bilan amalga kiritilgan “Oliy ta’lim muassasasida sirtqi (maxsus sirtqi) ta’limni tashkil etish tartibi to‘g‘risidagi nizom”ning 5,6-bandlariga ko‘ra sirtqi (maxsus sirtqi) ta’limga talabalarni qabul qilish:

Sirtqi shaklda — umumiy o‘rta (10-11-sinflar negizida), o‘rta maxsus, kasb-hunar ma’lumoti to‘g‘risidagi tegishli hujjatga ega bo‘lgan va test sinovlaridan (kirish imtihonlaridan) muvaffaqiyatli o‘tgan;

Maxsus sirtqi shaklda — faqat tegishli yoki turdosh ta’lim yo‘nalishi bo‘yicha o‘rta maxsus, kasb-hunar ma’lumotiga va ta’lim yo‘nalishiga muvofiq soha, kasb, lavozimlarda kamida uch yillik amaliy ish stajiga (pedagogika yo‘nalishlari uchun pedagogik stajga) ega bo‘lgan, tegishli vazirliklar va idoralar tomonidan berilgan tavsiyanomaga ega, test sinovlaridan (kirish imtihonlari yoki kasbiy suhbatdan) muvaffaqiyatli o‘tgan;

ikkinchi va undan keyingi oliy ma’lumot berishning sirtqi shaklda — oliy ma’lumotga ega bo‘lgan (agar xorijiy oliy ta’lim muassasasini tugatgan bo‘lsa, oliy ma’lumot to‘g‘risidagi hujjati belgilangan tartibda tan olingan (nostrifikatsiya qilishgan) bo‘lishi kerak) va test sinovlaridan (kirish imtihonlaridan yoki kasbiy suhbatdan) muvaffaqiyatli o‘tgan abituriyentlar hisobidan amalga oshiriladi, sirtqi (maxsus sirtqi) ta’limga talabalarni qabul qilish O‘zbekiston Respublikasi Vazirlar Mahkamasining 2017 yil 20 iyundagi 393-son qarori bilan tasdiqlangan Oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risidagi nizomga muvofiq amalga oshiriladi.

O‘z.R. Vazirlar Mahkamasining 2017 yil 20 iyundagi 393-son qarori bilan amalga kiritilgan “Oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risidagi nizom”ning 12-bandida maxsus sirtqi bo‘lim abituriyentlari uchun mehnat daftarchasidan belgilangan tartibda tasdiqlangan ko‘chirma va ishlab turgan sohadan tavsiyanoma ham taqdim etilishi belgilangan. Mazkur tavsiyanoma korxona, muassasa, tashkilot kadrlar bo‘limi xodimi yoki boshqa xodim tomonidan yozilshidan qat’i nazar, qoidaga ko‘ra ularning rahbarlari tomonidan imzolanishi lozim bo‘ladi.

O‘z.R. Vazirlar Mahkamasining 2001 yil 17 avgustdagi 344-son qarorining 1-bandida 2001 yil 1 sentyabrdan boshlab davlat grantlari bo‘yicha va to‘lov-kontrakt asosida o‘qitishning kunduzgi shaklida ta’lim olayotgan oliy o‘quv yurtlarining barcha talabalarini (xorijiy mamlakatlar talabalaridan tashqari) stipendiya bilan ta’minlash joriy etilgan bo‘lib, sirtqi shaklda ta’lim olayotgan talabalar stipendiya bilan ta’minlanishi amaldagi qonunchiligimizda nazarda tutilmagan.

O‘z.R. Vazirlar Mahkamasining 2017 yil 20 iyundagi 393-son qarori bilan amalga kiritilgan “Oliy ta’lim muassasalarining bakalavriatiga talabalarni o‘qishga qabul qilish tartibi to‘g‘risidagi nizom”ning 3-bandida belgilanishicha, oliy ta’lim muassasalariga talabalarni qabul qilish O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasi (keyingi o‘rinlarda Davlat komissiyasi deb ataladi) tomonidan test sinovlari natijalariga ko‘ra to‘plangan ballarning reyting tizimi bo‘yicha amalga oshiriladi. Yuqoridagilarga ko‘ra, oliy ta’limning boshqa shakllarida bo‘lgani kabi sirtqi shaklga kirishda ham test topshiriladi hamda sirtdan o‘qishga hujjat topshirgan abituriyent o‘qishga kirishi kafolatlanmagan.

 

Manba: http://maslahatim.uz

Ko'rishlar soni(235)