Institut nizomi

Abdulla Qodiriy nomidagi Jizzax davlat pedagogika institutining

N I Z O M I

  1. Umumiy qoidalar

1.1. Abdulla Qodiriy nomidagi Jizzax davlat pedagogika instituti (qisqartirilgan nomi: Jizzax DPI) O’zbekiston Respublikasi qonunlari asosida davlat ta’lim standartlariga muvofiq kunduzgi va sirtqi bo’limlarda oliy ma’lumotli pedagog mutaxassislar tayyorlashning ko’p bosqichli dasturini amalga oshiruvchi, oliy ma’lumotli bakalavr va magistr akademik darajasini berish huquqiga ega bo’lgan muassasadir.
1.2. Institutning yuridik manzili:
130100, Jizzax shahri,
Sh.Rashidov shox ko’chasi, 4-uy.

1.3. Institut o’z faoliyatida O’zbekiston Respublikasining Konstitusiyasi, Qonunlari, O’zbekiston Respublikasi Prezidentining Qarorlari, Farmonlari va Farmoyishlari, Vazirlar Mahkamasining Qaror va Farmoyishlari, O’zbekiston Respublikasining boshqa me’yoriy hujjatlari, Xalq ta’limi, Oliy va o’rta maxsus ta’lim vazirliklarining buyruq va ko’rsatmalari va mazkur Ustavga amal qiladi.
1.4. Institut siyosiy partiyalar va ijtimoiy siyosiy harakatlar ta’siridan xoli bo’lib, ularning institut faoliyatiga aralashuviga yo’l qo’yilmaydi.
1.5. Institut yuridik shaxs hisoblanib, O’zbekiston Respublikasi gerbi tasvirlangan va o’z nomi yozilgan muhriga, shtampiga, shuningdek, mustaqil balanslariga ega bo’lib, o’z hisobidagi mulkka egalik qiladi, undan foydalanadi va o’rnatilgan tartibda tasarruf etadi. Institut belgilangan me’yoriy standart asosida hujjatlar yuritadi va hisobot beradi.
1.6. Institutda O’zbekiston Respublikasining “Fuqarolar murojaati haqida”gi Qonuniga ko’ra fuqarolar qabul qilinadi va ularning xat, arizalari Qonun asosida ko’rib chiqiladi.

  1. Institutning maqsad va vazifalari


2.1. Institut faoliyatining asosiy maqsadi yuksak ma’naviy va axloqiy talablarga javob beruvchi yuqori malakali oliy ma’lumotli bakalavr va magistr darajasiga ega bo’lgan kadrlar tayyorlashdir.
2.2. Ushbu maqsadni ruyobga chiqarishdagi asosiy vazifalari:
tanlangan ixtisosliklar bo’yicha yuksak umummilliy madaniyatni va kasb mahoratni mujassamlashtirgan oliy ta’lim davlat standartlari darajasida yuqori malakali pedagog kadrlar tayyorlash;
xalq xo’jaligi masalalarini hal qilishga, pedagogik ta’limni yuksaltirishga yo’naltirilgan ilmiy-amaliy tadqiqotlar, tajriba-loyiha ishlarini tashkil qilish va yuritish;
institut o’qituvchi kadrlarining ilmiy va metodik malakasini oshirish;
maktabgacha, umumiy o’rta, o’rta maxsus va kasb-hunar, oliy ta’lim muassasalari, ilmiy tadqiqot institutlari, xalq ta’limi boshqaruv organlari bilan aloqani har tomonlama rivojlantirish;
institutda maktabgacha, umumiy o’rta, o’rta maxsus va kasb-hunar va oliy ta’lim muassasalari uchun fundamental bilimlar asosida darsliklar, qo’llanmalar va boshqa o’quv adabiyotlar yaratish;
aholi o’rtasida bilim, ma’rifat tarqatish, jamiyatimizning ma’naviy-ma’rifiy darajasini yuksaltirishga imkon beradigan tadbirlarni amalga oshirish.

  1. Institutning ta’lim oluvchilari



3.1. Institut talabalari safiga qabul qilish O’zbekiston Respublikasi Vazirlar Mahkamasi huzuridagi Ta’lim muassasalariga qabul qilish bo’yicha Davlat komissiyasi tasdiqlagan “O’zbekiston Respublikasi oliy ta’lim muassasalarining bakalavriatiga talabalarni qabul qilish tartibi va qoidalari to’g’risida”gi Nizom, “O’zbekiston Respublikasi oliy ta’lim muassasalarining magistraturasiga qabul qilish tartibi va qoidalari to’g’risida”gi Nizomga hamda Ta’lim muassasalariga qabul qilish bo’yicha Davlat komissiyasi qarorlariga asosan amalga oshiradi.
3.2. Talabalarni o’qishini boshqa oliy o’quv yurtlariga ko’chirish, qayta tiklash va o’qishdan chetlashtirish, ikkinchi ta’lim berish Respublika Vazirlar Mahkamasi huzuridagi Ta’lim muassasalariga qabul qilish bo’yicha Davlat komissiyasi tomonidan tasdiqlangan va O’zbekiston Respublikasi Adliya vazirligi tomonidan ro’yxatga olingan «O’zbekiston Respublikasi ta’lim muassasalari talabalari (o’quvchilari) o’qishini ko’chirish, qayta tiklash va o’qishdan chetlashtirish tartibi va qoidalari to’g’risida»gi Nizom hamda «O’zbekiston Respublikasi ta’lim muassasalarida ikkinchi ta’lim olish tartibi to’g’risida»gi Nizomga asosan amalga oshiradi.
3.3. O’zbekiston Respublikasi Ta’lim muassasalariga qabul qilish bo’yicha Davlat komissiyasi qarori bilan talabalikka tavsiya etilgan abituriyentlar institut rektorining buyrug’i bilan o’qishga qabul qilinadi va ularga tegishli namunadagi talabalik guvohnomasi hamda reyting daftarchasi beriladi.
3.4. Institutda ishlab chiqarishdan ajralgan holda o’qiyotgan, Davlat grantlari asosida qabul qilingan talabaga o’zlashtirishiga qarab, O’zbekiston Respublikasi Hukumati tomonidan beriladigan talabalik oylik-stipendiya to’lanadi. Bulardan tashqari, faqat a’loga o’qiydigan, ma’naviy yetuk talabalarga tanlov asosida O’zbekiston Respublikasi Prezidenti stipendiyasi, Respublikada ta’sis etilgan Mirzo Ulug’bek, Alisher Navoiy, Beruniy, Ibn Sino nomli davlat stipendiyalari, Xalq ta’limi vazirligi, Oliy va o’rta maxsus ta’lim vazirligining buyruqlari, shuningdek, shahar va tuman hokimliklari tomonidan ta’sis etilgan nomli stipendiyalar tegishli Nizomlar asosida beriladi. Stipendiya to’lash tartibi va uning miqdori O’zbekiston Respublikasi Vazirlar Mahkamasining 2002 yil 4 yanvardagi “Oliy o’quv yurtlari talabalariga stipendiya to’lash tartibi va miqdori to’g’risida”gi 13-sonli qaroriga muvofiq O’zbekiston Respublikasi Oliy va o’rta maxsus ta’lim hamda Moliya vazirliklari tomonidan tasdiqlangan “O’quv yurtlarida stipendiya tayinlash va to’lash tartibi to’g’risida”gi Yo’riqnoma va unga 2005 yil 22 avgustdagi 191-sonli o’zgartirish kiritish haqidagi qarori asosida amalga oshiriladi. O’zga viloyatlar, shaharlar va tumanlardan kelgan, yashash joyga muhtoj talabalarga imkoniyat darajasida talabalar turar joyidan joy beriladi. Talabalar turar joyidagi mavjud xonalardan boshqa maqsadlarda foydalanish ta’qiqlanadi.
3.5. Institut talabalari quyidagi huquqlarga ega:
o’z insoniy qadrini hurmat qilishni talab etish, vijdon erkinligi, o’z qarash va e’tiqodini namoyon qilish;
jamoat tashkilotlari orqali institut faoliyatining muhim masalalarini hal qilishda, o’quv jarayonini takomillashtirishda qatnashish;
o’quv-tarbiya jarayonida ko’zda tutilgan tadbirlarni o’tkazishda laboratoriyalar, kabinetlar, auditoriyalar, axborot-resurs markazi, o’quv-yordamchi binolardan, shuningdek, sport va sog’lomlashtirish maskanlaridan hamda institutning boshqa bo’linmalari xizmatlaridan bepul foydalanish;
ilmiy-tadqiqot va o’quv-metodik seminarlar, anjumanlar, simpoziumlarda qatnashish, o’z ilmiy ishlarini chop etish;
yashash sharoiti va dam olishni tashkil qilish masalalarini hal qilishda qatnashish, talabalarni o’z-o’zini boshqarishni takomillashtirish, jamoat tashkilotlari faoliyatida qatnashish;
o’qishni mehnat faoliyatining boshqa ko’rinishlari bilan birgalikda olib borishda ilm va kasb-hunar egallash, o’quv mashg’ulotlaridan bo’sh paytda mehnat qilish.
3.6. Institut talabalarning burchlari:
O’zbekiston Respublikasi qonunlariga, axloqiy va estetik me’yorlariga, millatlararo o’zaro hurmat talablariga amal qilish;
tanlangan mutaxassisliklar bo’yicha zamonaviy tadqiqot metodlarini va bilimlarni, amaliy ko’nikmalarni, ijtimoiy-gumanitar fanlarni chuqur egallash;
ta’limning o’quv rejasi va dasturida ko’zda tutilgan o’quv mashg’ulotlarida qatnashish, topshiriqning hamma turlarini belgilangan muddatda bajarish;
bilim, amaliy ko’nikmalar, ixtisoslik sirlarini og’ishmay egallab borish, muntazam ravishda umuminsoniy, ma’naviy-axloqiy saviyasini oshirish va jismoniy faoliyatlarini takomillashtirishga intilish;
institut Ustavi va ichki tartib-qoidalariga rioya qilish.
3.7. O’zbekiston Respublikasi Hukumati, Xalq ta’limi va Oliy va o’rta maxsus ta’lim vazirligi tomonidan belgilangan tadbirlardan tashqari holatda talabalarning mashg’ulotlarni qoldirishlariga ruxsat etilmaydi.
3.8. Fanlarni o’zlashtirishdagi muvaffaqqiyatlari va ilmiy-tadqiqot hamda jamoat ishlarida faol ishtirok etgan talabalar belgilangan tartibda moddiy-ma’naviy rag’batlantiriladi. Institut Ustavi, ichki tartib-qoidalarini buzgan talabalarga nisbatan qo’yidagi jazolar qo’llaniladi: xayfsan, qat’iy xayfsan, oliy o’quv yurti talabalari safidan chiqarish.
3.9. Tibbiy ko’rsatkichlar va boshqa istisnoiy hollarda, talabaga belgilangan tartibda akademik ta’til beriladi. 1 kurs talabalariga akademik ta’til istisnoiy hollarda, qat’iy yakka (individual) tartibda beriladi. O’zbekiston Respublikasi qonuniga muvofiq, kunduzgi o’quv shakli talabalariga oliy o’quv yurtida o’qiyotgan vaqti davomida harbiy xizmatga chaqirish muddatini kechiktirish imkoni beriladi.
3.10. Institut kunduzgi bo’lim bitiruvchilarini ishga joylashtirish “Kadrlarni davlat grantlari asosida maqsadli tayyorlash tartibi to’g’risida”gi Nizom, O’zbekiston Respublikasi Mehnat Kodeksi asosida amalga oshiriladi. Institut bitiruvchi talabalarning pedagogik faoliyat olib borishi bo’yicha xalq ta’limi muassasalari bilan shartnoma tuzishda yordam beradi hamda uch yil davomida ularning faoliyati monitoringini olib boradi.

  1. Institutda o’quv-tarbiya va ilmiy-metodik ishlar



4.1. Institutda ta’lim uzluksiz bo’lib, ta’lim jarayoni ta’limni boshqarish bo’yicha vakolatli davlat organlari tomonidan tasdiqlangan ta’lim yo’nalishlari va mutaxassisliklar bo’yicha ta’lim mazmunini belgilash, o’quv jarayonini tashkil qilish O’zbekiston Respublikasi Vazirlar Mahkamasining 2001 yil 16 avgustdagi «Oliy ta’limning Davlat ta’lim standartlarini tasdiqlash to’g’risida»gi 343-sonli qarori bilan tasdiqlangan Davlat ta’lim standartlari va namunaviy o’quv rejalari asosida olib boriladi.
4.2. Institutda o’qitish ishlab chiqarishdan ajralgan, ajralmagan holda va mustaqil tayyorgarlik asosida olib boriladi.
4.3. O’zbekiston Respublikasi “Davlat tili haqida”gi Qonuniga muvofiq institutda ta’lim o’zbek, qozoq va rus tillarida olib boriladi.
4.4. O’quv mashg’ulotlariga ajratilgan akademik soatda talabalar o’quv jarayoni bilan bog’liq bo’lmagan ishlarga jalb qilishga yo’l qo’yilmaydi.
4.5. Institutning ma’naviy-ma’rifiy ishlari talabalar va o’qituvchilarning o’quv, ilmiy-ijodiy, ishlab chiqarish va ijtimoiy faoliyatlari bilan birgalikda olib boriladi. Talabalar o’z-o’zini boshqarish tashkilotlari, to’garaklar, klublar, havaskorlik birlashmalarini tashkil etadilar va ishtirok etadilar.
4.6. Institut talabalarining bilimi, malaka va ko’nikmalarini nazorat qilish va baholash O’zbekiston Respublikasi Oliy va o’rta maxsus ta’lim vazirligining 1999 yil 8 iyundagi 194-sonli buyrug’i bilan tasdiqlangan “Oliy ta’lim muassasalarida talabalar bilimini nazorat qilish va baholashning reyting tizimi to’g’risida” namunaviy Nizom, 2000 yil 7 fevraldagi 27-sonli “Me’yoriy hujjatlarga qo’shimchalar kiritish haqida”gi buyrug’i va 2005 yil 30 sentyabrdagi 217-sonli buyrug’i bilan tasdiqlangan «Oliy ta’lim muassasalarida talabalar bilimini baholashning reyting tizimi to’g’risida»gi muvaqqat Nizom asosida ishlab chiqilgan va institut Ilmiy Kengashi qarori bilan tasdiqlangan “Institut talabalar bilimini nazorat qilish va baholashning reyting tizimi to’g’risida”gi Nizom asosida ko’p balli baholash tizimida amalga oshiriladi.
4.7. Institut talabalarning bilimi, malaka va ko’nikmalari joriy, oraliq va yakuniy nazorat natijalari asosida ma’lum o’quv fani uchun ajratilgan o’quv soatlari miqdori asosida ko’p balli tizimda baholanadi hamda o’zlashtirish foizi reyting daftarchasida qayd etiladi.
4.8. Davlat ta’lim standartiga muvofiq o’quv ta’lim-kasbiy faniga ajratilgan soat hajmini belgilangan muddatlarda o’zlashtirmagan hamda reyting nazorati turlari asosida ijobiy baholanmagan talabalar navbatdagi kursga ko’chirilmaydi va talabalar safidan chiqariladi.
Uzrli sabablar bilan o’quv rejalari talablarini bajarmagan talabalarga akademik qarzlarini uzish uchun yangi o’quv yili boshlangunga qadar bo’lgan muddatda imkoniyat beriladi.
4.9. Davlat ta’lim standartiga muvofiq bakalavriat o’quv rejasi va dasturini to’la bajargan talabalar yakuniy davlat attestasiyasi va bitiruv malakaviy ish himoyasiga, magistratura o’quv rejasi va dasturini to’la bajargan magistrantlar esa magistrlik dissertasiyasi himoyasiga qo’yiladi.
Yakuniy davlat attestasiyasi O’zbekiston Respublikasi Oliy va o’rta maxsus ta’lim vazirligi tomonidan tasdiqlangan “O’zbekiston Respublikasi oliy o’quv yurtlari bitiruvchilari yakuniy davlat attestasiyasi to’g’risida” Nizomga muvofiq amalga oshiriladi. Yakuniy davlat attestasiyasi asosida bitiruvchiga ta’lim yo’nalishi bo’yicha “Bakalavr” darajasi hamda davlat tomonidan tasdiqlangan diplom beriladi.
O’quv rejasidagi fanlarning 75% dan kam bo’lmagan qismi hamda barcha fanlar bo’yicha yakuniy davlat attestasiyasi va malakaviy bitiruv ishi uchun qo’yilgan eng yuqori ballning 85% dan, boshqa fanlardan eng yuqori ballning 70% dan yuqori bo’lgan qismi miqdorida baholangan talabalarga imtiyozli diplom beriladi. Bakalavr darajasidagi oliy ma’lumoti to’g’risidagi diplomga o’quv rejasida belgilangan fanlar ro’yxati, ularning hajmi va o’zlashtirish ballari yozilgan varaqa ilova qilinadi.
4.10. Institutdagi o’quv mashg’ulotlarining quyidagi turlari belgilangan:
Ma’ruza, laboratoriya, amaliy va seminar mashg’ulotlari, pedagogik va ishlab chiqarish amaliyoti, kurs ishlari, malakaviy bitiruv ishi, magistrlik dissertasiyasi, konsultasiyalar, nazorat ishlari, talabalarning mustaqil ishlari.
4.11. O’quv auditoriya mashg’ulotlarining barcha turlari uchun 80 daqiqalik akademik soat va ular orasidagi tanaffus 10 daqiqa etib belgilangan.
Oliy ta’limda kasbiy ta’lim dasturi doirasida ta’lim olishning barcha shakllari yagona Davlat ta’lim standarti asosida olib boriladi.
4.12. Institutda o’quv yili ikki semestrdan iborat bo’lib, alohida tasdiqlangan jadval asosida mashg’ulotlar olib boriladi. Har bir semestrda talabalarning bilimi, malaka va ko’nikmalari ko’p balli reyting tizimiga asoslangan baholash bilan yakunlanadi. Kasbiy-ixtisoslik (folklorshunoslik, dialektologik, arxeologik, o’simlikshunoslik va boshqa) amaliyotlar o’quv rejasi bilan tasdiqlangan muddatlarda o’tkaziladi.
O’quv rejasidagi fanlarni to’liq o’zlashtirgan talabalarni kursdan kursga o’tkazish fakultet dekanining tavsiyasiga binoan rektor buyrug’i bilan amalga oshiriladi.
Talabalarni kursdan kursga shartli o’tkazish mumkin emas.
4.13. Institutda ilg’or pedagogik va informasion texnologiyalar, ta’limni individuallashtirish va mustaqil ta’lim olish vositalarini, modul tizimi hamda masofali ta’lim berishni qo’llash hisobiga mutaxassislar tayyorlash sifatini oshirishga yo’naltirilgan ilmiy-uslubiy ishlar amalga oshiriladi.
Ilmiy-tadqiqot sohasidagi ishlarning asosiy vazifalari quyidagilardan iborat:
nazariy muammolarni ishlab chiqish;
ta’lim sohasidagi dolzarb muammolarni yechish;
darslik, o’quv qo’llanmalar yaratish;
ilmiy-metodik xarakterdagi tadqiqot ishlarini yuksaltirish;
xalq xo’jaligining boshqa sohalari bilan bog’liq dolzarb muammolarni yechish.
Institut o’z tadqiqot ishlari natijalarini xalq xo’jaligida, shu jumladan, ta’lim sohasida tadbiq qilish hamda fan, texnika, madaniyat sohalarida erishilgan yutuqlarni targ’ib qilishda ishtirok etadi.
4.14. Institutda ilmiy-tadqiqot, ilmiy-pedagogik kadrlarni tayyorlash va qayta tayyorlash ishlari “Oliy ta’lim to’g’risida”gi Nizom, “Magistratura to’g’risida”gi Nizom, “Aspirantura to’g’risida”gi Nizom, “Doktorantura to’g’risida”gi Nizom va joriy me’yoriy hujjatlar, ya’ni:
oliy ta’lim muassasalari, ilmiy muassasalar huzuridagi magistratura, aspirantura, doktorantura;
ilmiy izlanuvchanlik tartibida;
ilmiy xodim lavozimiga o’tkazish tartibida;
malaka oshirish va qayta tayyorlash kurslari hamda markazlarida;
ishlab chiqarish tashkilotlari va qonunlar bilan tasdiqlangan boshqa yo’nalishlar asosida amalga oshiriladi.
O’zbekiston Respublikasi Oliy Attestasiya Komissiyasi tomonidan tasdiqlangan mutaxassisliklar bo’yicha institutda oliy o’quv yurtlaridan keyingi ta’lim doirasida (aspirantura va doktorantura) ilmiy-pedagogik kadrlarni tayyorlash, shuningdek fan nomzodi yoki doktorlik dissertasiyalarini tayyorlash va ilmiy tadqiqotlarini himoya qilish uchun yetakchi oliy o’quv yurtiga izlanuvchilarni biriktirish ishlari amalga oshiriladi.
Oliy o’quv yurtidan keyingi ta’lim olish “Uzluksiz ta’lim tizimida ilmiy va ilmiy-pedagogik kadrlar tayyorlash to’g’risidagi Nizom”ga muvofiq amalga oshiriladi.
Institut Ilmiy Kengashining tematik rejalari bo’yicha, bajariladigan ishlarining sifati samaradorligini oshirish hamda mehnat xavfsizligini ta’minlash maqsadida talabalar, aspirantlar va doktorantlarni ilmiy tadqiqot va ijodiy ishlarga jalb etiladi.
4.15. Quyidagilar tematik ilmiy-tadqiqot ishlari uchun mablag’lar manbai hisoblanadi:
fan, texnika va pedagogikaning muhim yo’nalishlari bo’yicha fundamental va amaliy tadqiqot izlanishlari uchun davlat byudjetidan ajratiladigan mablag’lar;
vazirliklar, boshqarmalar, birlashmalar, tashkilotlar, korxonalar bilan tuzilgan shartnomalar asosida tushgan mablag’lar;
homiy va vasiy tashkilotlardan tushgan mablag’lar;
institutning ishlab chiqarishi va ijtimoiy taraqqiyot fondi.

  1. Institutning tarkibi



Institut tarkibiga quyidagilar kiradi:
5.1. Fakultetlar:
1. Fizika-matematika
2. Tabiatshunoslik
3. Tarix
4. O’zbek filologiyasi
5. Xorijiy tillar
6. Pedagogika
7. Jismoniy tarbiya va jismoniy madaniyat
8. Maxsus sirtqi bo’lim
9. Malaka oshirish va qayta tayyorlash

5.2. Kafedralar:
1. Umumiy matematika
2. Informatika va axborot texnologiyalari
3. Umumiy fizika
4. Texnika fanlari
5. Tasviriy san’at va ishlab chiqarish asoslari
6. Mehnat ta’limi o’qitish uslubiyati
7. Biologiya va uni o’qitish uslubiyati
8. Kimyo-ekologiya va uni o’qitish uslubiyati
9. Inson hayotiy faoliyati muhofazasi
10. Geografiya va iqtisodiy bilim asoslari
11. Mintaqaviy geografiya va uni o’qitish uslubiyati
12. Milliy istiqlol g’oyasi; huquq va ma’naviyat asoslari
13. Ijtimoiy fanlar
14. Umumiy tarix
15. O’zbekiston tarixi
16. O’zbek tilshunosligi
17. O’zbek adabiyoti
18. O’zbek tili va adabiyoti o’qitish uslubiyati
19. Ingliz tili va adabiyoti
20. Rus tili va xorijiy adabiyot
21. Chet tili (fakultetlararo)
22. Pedagogika
23. Psixologiya
24. Boshlang’ich ta’lim uslubiyati
25. Maktabgacha ta’lim nazariyasi va uslubiyati
26. Musiqa nazariyasi va uslubiyati
27. Cholg’u asboblari va an’anaviy ixrochilik
28. Defektologiya, maxsus psixologiya nazariyasi va texnologiyalari
29. Jismoniy tarbiya nazariyasi va milliy sport turlari uslubiyati
30. Sport fanlari uslubiyati
31. Jismoniy madaniyat va sport (fakultetlararo)

5.3. Ilmiy, o’quv laboratoriyalari va kabinetlar:
1. Arxeologiya ilmiy laboratoriyasi
2. Anatomiya va fiziologiya laboratoriyasi
3. Elektrotexnika laboratoriyasi
4. Traktor va avtomobil laboratoriyasi
5. Tikuvchilik texnologiyasi laboratoriyasi
6. Ovqat tayyorlash texnologiyalari laboratoriyasi
7. Fizika laboratoriyasi
8. Kimyo laboratoriyasi
9. Rang tasvir kabineti
10. Qalam tasvir kabineti
11. Chizmachilik kabineti
12. Botanika kabineti
13. Zoologiya kabineti
14. Biologiya kabineti
15. Chilangarlik ustaxonasi
16. Yog’och ustaxonasi
17. Tokarlik ustaxonasi
18. Zardo’zlik

5.4. Bo’limlar:
1. Ma’naviyat va ma’rifat, iqtidorli yoshlar bilan ishlash bo’limi
2. Ichki nazorat va monitoring bo’limi
3. O’quv-uslubiy bo’lim
4. Ilmiy va ilmiy-pedagogik kadrlarni tayyorlash bo’limi
5. Reja va moliya bo’limi
6. Buxgalteriya
7. Kadrlar bo’limi
8. 1- va 2-bo’lim
9. Devonxona va arxiv
10. O’qitishning texnik vositalari bo’limi
11. Mehnatni muhofaza qilish bo’limi
12. Ekspluatasion-texnik va xo’jalik bo’limi
13. Talabalar turar joyi
14. Marketing bo’limi
15. O’quv-dala va o’quv-ishlab chiqarish amaliyotlarini o’tkazish bazasi
16. Muzey
17. Kutubxona
18. Axborot-resurs markazi
19. Axborot texnologiyalar markazi:
– axborot va texnik ta’minot bo’limi
– o’quv-ta’lim resurslarini tadbiq etish va dasturiy ta’minot bo’limi
20. Tahririyat-nashriyot bo’limi
21. Milliy istiqlol g’oyasini o’rganish va targ’ib qilish markazi.

5.5. Kafedralarda institutning ta’lim yo’nalishlari va mutaxassisliklariga oid aniq, gumanitar hamda ijtimoiy fanlar bo’yicha ilmiy-nazariy, o’quv-metodik tadqiqot ishlari, talabalar orasida ma’naviy-ma’rifiy ishlar, ilmiy-pedagogik hodimlarni tayyorlash ishlari olib boriladi. Shuningdek, bu ishlarning amalga oshirilishida kafedra asosiy o’quv ilmiy bo’linma bo’lib hisoblanadi.
5.6. Institut qoshidagi № 1 va № 2 akademik liseylarda institutning quyidagi kafedralari filiallari faoliyat ko’rsatadi:
– aniq fanlar;
– tabiatshunoslik;
– tarix;
– o’zbek tili va adabiyoti;
– chet tillari;
– jismoniy tarbiya nazariyasi va amaliyoti.
5.7. Institut tarkibidagi barcha o’zgarishlar Xalq ta’limi vazirligi bilan kelishilgan holda institut Ustaviga kiritiladi.

  1. Professor-o’qituvchilar, hamda o’quv-tarbiya jarayonini tashkil qiluvchi yordamchi xodimlar tarkibi

6.1. Institutda professor-o’qituvchilar tarkibi, ilmiy xodimlar, muhandislik-texnika, ma’muriy-xo’jalik, ishlab chiqarish, o’quv-yordamchi va boshqa xizmatchilar lavozimlari mavjud. Professor-o’qituvchilar tarkibiga kafedra mudiri, professor, dosent, katta o’qituvchi, o’qituvchi va assistent lavozimlari kiradi.
6.2. Professor-o’qituvchilar tarkibidagi lavozimlarni egallash O’zbekiston Respublikasi Vazirlar Mahkamasi tomonidan 2006 yil 10 fevralda 20-sonli qarori bilan tasdiqlangan «Oliy ta’lim muassasalariga pedagog xodimlarni tanlov asosida ishga qabul qilish tartibi to’g’risida»gi Nizomga muvofiq, tanlov asosida mehnat shartnomasi bo’yicha amalga oshiriladi.
6.3. Institutning professor-o’qituvchilar tarkibi va ilmiy xodimlari quyidagi huquqlarga ega:
belgilangan tartibda oliy o’quv yurtining Ilmiy Kengashiga saylash va saylanish;
institut faoliyatiga taalluqli masalalarni muhokama etish va hal qilishda ishtirok etish;
institutning axborot-resurs markazi, o’quv va ilmiy bo’g’inlar (bo’linmalar)ning xizmatlaridan, shuningdek, ijtimoiy-maishiy, tibbiy va oliy o’quv yurti tuzilmasidagi boshqa bo’linmalari xizmatidan jamoa shartnomasiga muvofiq foydalanish;
o’qitishning uslub va vositalarini tanlash, o’quv va ilmiy jarayonning yuqori sifatini ta’minlovchi ilmiy tadqiqotlar o’tkazish;
institut ma’muriyatining buyruq va farmoyishlari yuzasidan qonunchilikda belgilangan tartibda shikoyat qilish;
o’zining kasbiy faoliyatini tashkiliy va moddiy-texnik jihatdan ta’minlash.
O’zbekiston Respublikasi qonunchiligiga muvofiq, oliy o’quv yurti tomonidan belgilangan boshqa huquqlardan foydalanish.
6.4. Institutning professor-o’qituvchilar tarkibi va ilmiy xodimlarning burchlari:
o’quv kurslari mazmunini oliy va oliy ta’limdan keyingi ta’limning davlat ta’lim standartiga muvofiq belgilash;
pedagogik va ilmiy jarayonning yuksak samaradorligini ta’minlash;
ushbu Ustavga rioya qilish;
talabalar bilan olib boriladigan ma’naviy-ma’rifiy ishlarda bevosita ishtirok etish, shu jumladan darsdan tashqari vaqtlarda ham;
ta’lim oluvchilarda tanlangan yo’nalish (mutaxassislik) bo’yicha yuksak kasbiy sifatlarni, fuqarolik nuqtai nazarni, zamonaviy sivilizasiya va demokratiya sharoitida mehnat va hayotga bo’lgan qobiliyatni shakllantirish;
ta’lim oluvchilarda mustaqil fikrlash, tashabbuskorlik, ijodiy qobiliyatni taraqqiy toptirish;
o’z malakasini oshirish ustida muttasil shug’ullanish.
6.5. qonunchilikda nazarda tutilgan hollardan tashqari holatlarda o’qituvchilarni kasbiy burchlarini bajarishdan boshqa narsalarga jalb etish ma’n etiladi.
6.6. Shtatlarning qisqarishi munosabati bilan ma’muriyatning tashabbusi bo’yicha o’qituvchilarni bo’shatish, faqat o’quv yili tugaganidan so’ng amalga oshiriladi.
6.7. Institut professor-o’qituvchilari tarkibiga uch yilda kamida bir marta malakasini oshirish kafolatini beradi.
6.8. Institutning ma’muriy-xo’jalik, muhandislik-texnika, o’quv-yordamchi va boshqa xizmat xodimlarining huquq va burchlari institutning ichki tartib-qoidalari va lavozimiy yo’riqnomalar bilan belgilanadi.

  1. Institutning boshqaruv organlari



7.1. Institut faoliyatini institut rektori boshqaradi.
Institut rektori Xalq ta’lim vazirligining tavsiyasi bilan O’zbekiston Respublikasi Prezidentining 2005 yil 7 maydagi “Oliy o’quv yurtlarining rektorlari va prorektorlarini tayinlash to’g’risida”gi R-2209 raqamli Farmoyishiga muvofiq O’zbekiston Respublikasi Vazirlar Mahkamasining qarori asosida tayinlanadi.
Institut rektorining vakolatlari O’zbekiston Respublikasi Oliy va o’rta maxsus ta’lim vazirligining 1998-yil 30-oktyabr 305-sonli buyrug’i bilan tasdiqlangan “Oliy ta’lim to’g’risida”gi Nizom, ushbu Ustav va boshqa me’yoriy hujjatlarda belgilangan bo’lib, rektor o’quv-tarbiya jarayoni ahvoli, mutaxassisliklar tayyorlash sifati, umuman institut faoliyat natijalariga to’la javobgardir. U institut Ustavi va qonunlarga muvofiq institut nomidan ish tutadi, institut faoliyati bilan bog’liq masalani mustaqil hal qiladi, barcha korxonalarda, tashkilotlarda institut manfaatini himoya qiladi, institut mol-mulkini o’rnatilgan tartibda tasarruf etadi, shartnomalar tuzadi, banklarda hisob raqami ochadi, mablag’larni tasarruf etish huquqidan foydalanadi, shtatlarni tasdiqlaydi, institutning barcha xodimlari uchun majburiy buyruqlar chiqaradi va ko’rsatmalar beradi.
7.2. Institut faoliyatining asosiy masalalarini ko’rib chiqish uchun Ilmiy Kengash tashkil etiladi. Ilmiy Kengash o’z faoliyatini Oliy va o’rta maxsus ta’lim vazirligi tomonidan tasdiqlangan “Oliy o’quv yurtining Ilmiy Kengashi to’g’risida”gi Nizom, mazkur Ustav asosida amalga oshiradi.
Ilmiy Kengash 5 yil muddatga saylanadi, har oyda bir marta majlis o’tkazadi. Ilmiy Kengash a’zolarining soni, uning tarkibi va vazifalari O’zbekiston Respublikasi Oliy va o’rta maxsus ta’lim vazirligi tasdiqlagan qoidalarga ko’ra belgilanadi. Nizom bo’yicha Ilmiy Kengash tarkibiga rektor (raisi), prorektorlar, fakultet dekanlari, mutaxassis chiqaruvchi kafedralar mudiri, institut “Kamolot” yoshlar ijtimoiy harakati va kasaba uyushmasining vakillari kiradi. Ilmiy Kengashning boshqa a’zolari fakultetning umumiy majlisida yashirin ovoz berish yo’li bilan saylanadilar. Professor-o’qituvchilar tarkibidan Ilmiy Kengashga saylanuvchi a’zolarning soni rektorning buyrug’i bilan belgilanadi. Ilmiy Kengash tarkibiga institutning muayyan yo’nalishi bo’yicha ishlovchi, yirik olim va mutaxassislar, shuningdek, davlatlararo va bevosita aloqalari bo’lgan xorijiy o’quv yurtlarining vakillari kiritilishi mumkin.
Institut Ilmiy Kengashining vakolati “Oliy o’quv yurtining Ilmiy Kengashi to’g’risida”gi Nizomda belgilangan talablar asosida amalga oshiriladi:
institut Ustavini qabul qilish, unga o’zgartirish va qo’shimchalarni kiritish;
institut boshqaruvi va taftish komissiyasini saylash, rejalarini ko’rib chiqish va tasdiqlash;
institut iqtisodiy va ijtimoiy rivojlantirishning asosiy masalalarini ko’rib chiqish;
iqtisodiy va ijtimoiy rivojlantirish fondlaridan foydalanish yo’nalishlarini aniqlash;
o’quv-tarbiya jarayonlarni tashkil qilishga oid barcha masalalar yuzasidan qarorlar qabul qilish;
belgilangan talablarga muvofiq fakultetlar, kafedralar, laboratoriyalarni tashkil qilish yoki ularni tugatishga oid masalalarni hal qilish;
professor-o’qituvchilar va ilmiy xodimlarni vazifalarga, ilmiy unvonlarga tavsiya qilish masalalarini muhokama qilish.
Ilmiy Kengash qarori rektor tomonidan tasdiqlangandan so’ng kuchga kiradi.
Institutda jamoat boshqaruv idorasi bo’lgan, tarkibiga ta’sischi (ta’sischilar), mahalliy hokimiyat idorasi, ishbilarmonlar, boshqa ta’lim muassasalari, jamoat tashkilotlari, fondlar va homiylar vakillari kirgan Vasiylar kengashi tashkil qilinishi mumkin. Vasiylar kengashining tarkibi, vakolati, shakllantirish tartibi va faoliyati Oliy va o’rta maxsus ta’lim vazirligi tomonidan tasdiqlangan “Vasiylar kengashi haqida”gi namunaviy Nizomda va ushbu Nizom asosida tuzilgan “Institut vasiylar kengashi haqida”gi Nizomda belgilangan.
7.3. Prorektorlar, institut rektori va O’zbekiston Respublikasi Xalq ta’lim vazirligi tavsiyasi asosida O’zbekiston Respublikasi Prezidentining 2005 yil 7 maydagi “Oliy o’quv yurtlarining rektorlari va prorektorlarini tayinlash to’g’risida”gi R-2209-sonli Farmoyishiga muvofiq O’zbekiston Respublikasi Prezidenti Devoni bilan kelishgan holda O’zbekiston Respublikasi Xalq ta’lim vazirligining buyrug’i bilan tayinlanadi.
O’quv-metodik, ilmiy, ma’naviy-ma’rifiy, ma’muriy-xo’jalik, iqtisodiy va tadbirkorlik ishlariga rahbarlik prorektorlar tomonidan amalga oshiriladi.
7.4. Fakultetlar faoliyatini O’zbekiston Respublikasi Xalq ta’limi vazirligi bilan kelishilgan holda institut rektori tomonidan tayinlangan dekanlar boshqaradilar. Fakultet dekanlarining asosiy vazifalari “Oliy ta’lim haqida”gi Nizom, “Oliy o’quv yurtining fakulteti to’g’risida”gi Nizom, mazkur Ustav va boshqa me’yoriy hujjatlar bilan belgilanadi.
Dekan fakultet faoliyatiga rahbarlikni belgilangan tartibda o’z vakolatlari doirasida amalga oshiradi, fakultetning barcha talaba va xodimlari tomonidan bajarilishi shart bo’lgan farmoyish va ko’rsatmalar beradi.
Fakultet faoliyatiga tegishli masalalarni ko’rib chiqish uchun fakultet Kengashi tashkil etiladi. Fakultet Kengashiga fakultet dekani (rais), uning shtatdagi muovinlari, kafedra mudirlari, talabalar va jamoat tashkilotlari vakillari kiradi.
Kengashning boshqa a’zolari fakultet jamoasi yig’ilishlarida yashirin ovoz berish yo’li bilan saylanadilar. Fakultet Kengashiga professor-o’qituvchilar va ilmiy xodimlar, boshqa toifadagi xodimlar, boshqa toifadagi xodimlar tarkibidan vakillik miqdori rektor tomonidan belgilanadi. Fakultet Kengashining vakolat muddati 5 yil. Kengash uning vakolatiga tegishli va institut Nizomiga muvofiq masalalarni hal qiladi. Kengash yig’ilishi bir oyda bir marta o’tkaziladi. Kengash qarorlari rektor tomonidan tasdiqlangandan so’ng kuchga kiradi.
7.5. Kafedra mudiri tanlov asosida Institut Ilmiy Kengashida yopiq ovoz berish yo’li bilan saylanadi. Kafedra mudiri tanlovida g’olib chiqqan professor-o’qituvchilar rektor buyrug’i bilan kafedra mudiri sifatida rasmiylashtiriladi. Kafedra mudiri kafedra faoliyatiga rahbarlik qiladi hamda kafedrada olib boriladigan o’quv jarayoniga oid barcha ishlariga to’liq javob beradi. Kafedra zimmasidagi vazifalar Oliy va o’rta maxsus ta’lim vazirligi tomonidan tasdiqlangan “Oliy o’quv yurtlari kafedralari to’g’risida”gi Nizom va boshqa me’yoriy hujjatlar bilan belgilangan.

  1. Institut jamoatchilik tashkilotlari



8.1. Institutda yoshlar tashkilotlari, xotin-qizlar, faxriylar, murabbiylar, ilmiy, ijodiy hamda boshqa uyushmalar O’zbekiston Respublikasi qonunlarida belgilangan tartibda jamoat birlashmalari shaklida o’z ustavlari va vakolatlari doirasida o’quv, ilmiy-metodik, ma’naviy-ma’rifiy ishlarini yaxshilashga yo’naltirilgan tadbirlarni ishlab chiqish va amalda qo’llashda faol ishtirok etadilar.
8.2. Institut kasaba uyushmasi O’zbekiston Respublikasi Konstitusiyasi, “Kasaba uyushmalar, ularning huquqlari va faoliyatlarining kafolatlari to’g’risida”gi Qonuni, O’zbekiston ta’lim va fan xodimlari kasaba uyushmalarining Ustavi asosida faoliyat yuritadi. Kasaba uyushmalarning asosiy maqsadi kasaba uyushma a’zolari va ularning oila a’zolarini ma’naviy, intellektual va boshqa huquqlarini himoya qilishda qonunchilik asosida birgalikda harakat qilishdan iboratdir. Institut kasaba uyushmasining asosiy vazifalari quyidagilardan iborat:
kasaba uyushmasi a’zolarining kasb va ijtimoiy huquqlarini himoya qilish;
jamoa xizmat faoliyati bilan bog’liq nizolarni bartaraf etishda ishtirok etish;
kasaba uyushmasi a’zolarining ijtimoiy va iqtisodiy ahvoli to’g’risidagi ma’lumotlarni tahlil etish shu asosda muvofiq karorlar qabul qilish;
professor-o’qituvchilar, xodimlar va talabalarning maishiy sharoitlarini yaxshilash, mehnatni muhofaza qilish hamda moddiy rag’batlantirish;
mehnat intizomini nazorat qilishi;
amaldagi qonunlar asosida xodimlarni ishga qabul qilish va ishdan bo’shatish va boshqalar.
8.3. Institutda talabalar ilmiy jamiyatlari, talabalar turar joylari kengashlari, talabalar sporti, badiiy havaskorlik klublari ushbu Ustav va institut ichki tartib-qoidalariga muvofiq faoliyat ko’rsatadi. Ushbu ko’ngilli jamoat tashkilotlari talabalar turar joylari va fakultetlardagi moddiy-maishiy sharoitlarini yaxshilash, talabalar, professor-o’qituvchilar va boshqa xodimlar o’rtasida ma’naviy-ma’rifiy, madaniy, sog’lomlashtirish ishlarini tashkil qilishda ishtirok etadilar.

  1. Institut mulki va mablag’lari



9.1. Institut xo’jalik yuritish huquqiga ega va maqomi bo’yicha muassasa hisoblanadi. Institut mulki davlat tasarrufida bo’lib, Ustavda ko’zda tutilgan faoliyatni ta’minlovchi asosiy fond va aylanma mablag’lar hamda boshqa boyliklar institutga biriktirib qo’yiladi.
9.2. Institut jismoniy va yuridik shaxslar hadya, xayr-ehson, vasiyat shaklida o’tkazilgan pul mablag’lari va mulkni hamda ishbilarmonlik faoliyati va xo’jalik tasarrufidagi mulkdan tushgan foydani o’rnatilgan tartibda mustaqil idora qiladi.
9.3 Institut belgilangan tartibda ajratilgan yer maydonlaridan muddatsiz va tekin foydalanish huquqiga ega.
9.4. Quyidagilar institutning moliyaviy manbalaridir:
respublika va mahalliy byudjetlardan ajratilgan mablag’lar;
mutaxassislarni (maqsadli ravishda) tayyorlash uchun institutga vazirliklar va idoralar tomonidan ajratilgan mablag’lar;
to’lov-shartnoma asosida o’qitishdan tushgan mablag’lar;
pullik ta’lim xizmatlari ko’rsatish, maxsus va texnik buyurtmalar, tashkilot va muassasalar bilan tuzilgan shartnomalar bo’yicha tushgan mablag’lar;
bank kreditlari;
chet el investisiyalari va xalqaro grantlar bo’yicha tushgan mablag’lar;
korxonalar va tashkilotlarning to’lovlari, ayrim yuridik va jismoniy shaxslarning xayriyalari.
9.5. Institutning moliya-xo’jalik faoliyati O’zbekiston Respublikasi qonunchiligi va moliya, mehnat, ish haqi kabi masalalariga oid boshqa me’yoriy hujjatlarga muvofiq yuritiladi.
9.6. Institut barcha toifadagi xodimlarning mehnatiga haq to’lash, moddiy va ma’naviy rag’batlantirish miqdori va shakli mehnat sharoiti, tegishli tartibda belgilangan mehnatga haq to’lash fondi doirasida belgilanadi. Bunda institut xodimlarining mansab maoshiga belgilangan tartibda ustama haq to’lash ham ko’zda tutiladi. Ustama haq xodimning shaxsiy ulushiga qarab belgilanadi. U kamaytirilishi yoki ish sifati susayganda to’xtatilishi mumkin.
Shartnoma asosida ishlayotgan o’qituvchilarga yuqori darajali maosh belgilanishi mumkin, ammo uning miqdori shu mansabga belgilangan eng yuqori maoshdan ortiq bo’lmasligi kerak.
Institutning mukofot fondi va aniq bir xodimga beriladigan mukofot miqdori me’yoriy hujjatlarga muvofiq belgilanadi.
9.7. Institut rektori ajratilgan mablag’ darajasida, shuningdek, xodimlarning belgilangan miqdori doirasida va Oliy o’quv yurtlari mansab maoshlarining amaldagi mundarijasiga asosan Xalq ta’limi vazirligi bilan kelishilgan holda institut tarkibini o’zgartirish, professor-o’qituvchilar tarkibini ham nazarga olgan holda institut shtat jadvalini o’zgartirish huquqiga ega.
9.8. Institut o’z oldiga qo’ygan vazifalarni amalga oshirish borasida qo’yidagi huquqlarga ega:
amaldagi qonunchilikka zid kelmaydigan Nizomlar, yo’riqnomalar, tavsiyanomalarni qabul qilish va amalga oshirish;
mustaqil tashkiliy tizimlarni belgilash;
professor-o’qituvchilar, muhandis-texnik xodimlari talabalar va aspirantlarning aqliy imkoniyatlaridan to’liq foydalanishni ta’minlovchi mehnatni tashkil qilish va rag’batlantirish shakllarini aniqlash;
o’z bazasida amaldagi Ustavga asosan maktabgacha, umumiy o’rta, o’rta maxsus va kasb hunar ta’lim muassasalari, pedagog xodimlar malakasini oshirish va qayta tayyorlash institutlarini qamrab oluvchi o’quv komplekslarini tashkil qilish;
shtat jadvalini tasdiqlash;
mavjud sxemaga tayanib, rahbarlik va professor-o’qituvchilarning o’rtacha oylik miqdorini joriy qilingan mehnatga haq to’lov fondi hajmiga asoslanib belgilash;
mehnatga haq to’lash uchun foydalaniladigan manbalarining yo’nalishini tanlab olish;
jamoada haq to’lov fondlarini ajratish, bunda institut xodimlarining (rahbarlarining) ish haqi maksimal miqdorini me’yoriy hujjatlarga muvofiq belgilash;
o’z tasarrufidagi binolarning ta’lim-tarbiya jarayonida foydalanilmayotgan qismini, institut hududida joylashgan va uning moliyaviy hisobidagi xizmat ko’rsatuvchi tibbiy xizmat, oshxona, isitish, yoritish va suv bilan ta’minlash vositalarini yuridik va jismoniy shaxslarga shartnoma asosida topshirish;
o’z mulki hisoblangan jihozlarini, asboblarini, qurilmalarini material va kitoblarini balansdan-balansga ko’chirish, sotish, yaroqsiz va eskirgan asosiy vositalarni balansdan chiqarish;
tashkilotlar va fuqarolarga turli xildagi xususan ta’lim sohasidagi xizmat ko’rsatilishini tashkil qilish, ulardan tushgan mablag’larni sarflash bo’yicha smetalarni tuzish va tasdiqlash;
ajratilgan mablag’ hisobiga yoki o’z shaxsiy fondidan zarur jihozlarni va boshqa moddiy boyliklari davlat va nodavlat tashkilotlardan sotib olish yoki ijaraga olish;
foydalanilmagan jihozlar, inventarlar material va boshqa vositalarni ijaraga berish natijasida tushgan mablag’larni o’z ixtiyorida qoldirish yoki ular yordamida o’quv, moddiy-texnik bazani kengaytirish, ulardan professor-o’qituvchilar, talabalar va ishchi-xodimlarni qo’shimcha ijtimoiy himoya qilish uchun foydalanish;
monografiyalar, ilmiy to’plamlar, darsliklar va o’quv qo’llanmalari, ilmiy konferensiyalar materiallari, metodik qo’llanmalar va boshqa ilmiy adabiyotlarni nashr qilish;
sport-sog’lomlashtirish, davolash, profilaktik va madaniy-oqarturuv maskanlarni yaratish;
boshqa tashkilotlar bilan hamkorlik qilish, turli assosiasiyalarga a’zo bo’lish va assosiasiyalar tuzish;
ilmiy-texnik, ijtimoiy hamda rag’batlantirish fondlarini tashkil qilish;
bu fondlar smeta loyihalarini institut Ilmiy Kengashi muhokamasiga qo’yish va kasaba uyushmasi qo’mitasi hamda ma’muriyatning birgalikdagi qarori bilan tasdiqlash.
Institut xorijiy mamlakatlardagi o’quv yurtlari, ilmiy-tadqiqot markazlari bilan o’zaro manfaatli hamkorlik o’rnatish haqida bitimlar tuzish hamda ikki tomonlama va ko’p tomonlama talabalar aspirantlar, doktorantlar, pedagogik va ilmiy xodimlar almashinuvi dasturlarida qatnashish, qo’shma fundamental va amaliy ilmiy-tadqiqotlar, tajriba konstruktorlik ishlarini olib borish, kongress, anjuman simpozium va tadbirlarda ishtirok etish.
9.9. Institutda xorijiy mamlakatlar fuqarolarini o’qitish til o’rgatish, qayta tayyorlash va malakasini oshirish tegishli Nizom va yo’riqnomalarga asosan amalga oshiriladi.

  1. Institutni qayta tashkil etish va tugatish



10.1. Institutni qayta tashkil etish tartibi qonun hujjatlariga muvofiq O’zbekiston Respublikasi Vazirlar Mahkamasi tomonidan belgilanadi.
10.2. Institutni tugatish O’zbekiston Respublikasi “Ta’lim to’g’risida”gi Qonuni va boshqa hujjatlarga muvofiq vakolatli davlat organlari tomonidan o’tkaziladigan akkreditasiya va attestasiya o’tkazish natijalariga ko’ra O’zbekiston Respublikasi Vazirlar Mahkamasi tomonidan amalga oshiriladi.

Ko'rishlar soni(1 020)