2006 – Homiylar va shifokorlar yili

O‘zbekiston Respublikasi Prezidentining Qarori

«Homiylar va shifokorlar yili» dasturi to‘g‘risida

(O‘zbekiston Respublikasi Qonun hujjatlari to‘plami, 2006 y., 4-5-son, 25-modda)
2006 yilning yurtimizda «Homiylar va shifokorlar yili» deb e’lon qilinganligi munosabati bilan hamda xalqimizning ma’naviy qadriyati sifatida homiylikning roli va ahamiyatini kuchaytirish, homiylik faoliyatining huquqiy asoslarini takomillashtirish, ushbu jarayonda aholi keng qatlamlari, barcha mulkchilik shaklidagi tashkilotlar va korxonalarning ishtirokini kengaytirish bo‘yicha aniq maqsadga yo‘naltirilgan chora-tadbirlar kompleksini amalga oshirish, ularning aholining ijtimoiy nochor qatlamlarini moddiy va ma’naviy qo‘llab-quvvatlash borasidagi hissasini oshirish, shuningdek, tibbiyot xodimlari kasbining obro‘-e’tiborini ko‘tarish va mehnat sharoitlarini yaxshilash maqsadida:
1. Quyidagi masalalar «Homiylar va shifokorlar yili»ning asosiy vazifalari etib belgilansin:
mamlakat bo‘yicha, mintaqalar, shaharlar, tumanlar va aholi punktlari miqyosida aholining ijtimoiy nochor qatlamlari, birinchi navbatda nogironlar, yolg‘iz keksalar, kam ta’minlangan oilalar va etim-esirlarga aniq moddiy yordam ko‘rsatish va ma’naviy qo‘llab-quvvatlash yuzasidan chora-tadbirlar dasturini amalga oshirish, keksalar va nogironlar internat-uylarida, «Mehribonlik» uylarida, jismoniy va aqliy rivojlanishda orqada qolgan bolalar maktab-internatlarining shart-sharoitlarini yaxshilash;
homiylikning mustahkam kafolatlanishi va ijtimoiy nuqtai nazardan keng e’tirof etilishini ta’minlaydigan qonunchilik va normativ-huquqiy bazani shakllantirish, o‘z daromadlarining bir qismini qalb amri bilan homiylik maqsadlariga yo‘naltirishga tayyor olijanob insonlarning xolisona intilishlarini qo‘llab-quvvatlash, xalqimiz, ayniqsa yoshlarning ongida mehr-muruvvat, saxovat va himmat kabi ezgu insoniy fazilatlarni yuksaltirish;
jamiyat hayotida tibbiyot xodimi kasbining nufuzi va uning maqomini oshirish, mohir shifokorlar, tajribali hamshiralar va mehnatsevar sanitarlarning mashaqqatli va mas’uliyatli ishlarini moddiy hamda ma’naviy rag‘batlantirish tizimini takomillashtirish, ular uchun munosib mehnat va turmush sharoitlarini yaratish;
tibbiy xizmatlar sifatini oshirish, aholining barcha tabaqalari qamrab olinishi va erkin foydalanishini ta’minlaydigan sog‘liqni saqlash tizimining zamonaviy moddiy-texnika bazasini, jumladan, xayriya tashkilotlari va homiylarning mablag‘larini jalb etish hisobiga, yanada mustahkamlash va undan samarali foydalanish.
2. Respublika komissiyasi tomonidan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralar, jamoat tashkilotlari hamda xayriya jamg‘armalari bilan birgalikda ishlab chiqilgan «Homiylar va shifokorlar yili» dasturi ilovaga* muvofiq tasdiqlansin.
* Ilova berilmaydi.
3. O‘zbekiston Respublikasi Vazirlar Mahkamasi:
ikki oy muddatda homiylik tushunchasi va uning mazmun-mohiyatini aniq belgilaydigan, yuridik va jismoniy shaxslarning ko‘makka muhtoj insonlarga yordam ko‘rsatish borasidagi sa’y-harakatlarini qo‘llab-quvvatlash, jumladan, davlat tomonidan tegishli imtiyozlar va qo‘shimcha imkoniyatlar berishning yaxlit tizimini yaratishni nazarda tutadigan «Homiylik to‘g‘risida»gi Qonun loyihasini ishlab chiqsin va O‘zbekiston Respublikasi Oliy Majlisining Qonunchilik palatasiga kiritsin;
ikki hafta muddatda «Tibbiyot xodimlari kuni» kasb bayramini ta’sis etish bo‘yicha takliflar kiritsin.
4. «Homiylar va shifokorlar yili» Dasturini ishlab chiqish va amalga oshirish bo‘yicha Respublika komissiyasi (Mirziyoev):
nodavlat tashkilotlari, birinchi navbatda fuqarolarning o‘zini o‘zi boshqarish organlarini, biznes, firmalar, kompaniyalar, xalqaro xayriya tuzilmalarining vakillarini homiylik ishlariga keng jalb etish va shu asosda homiylikni ommaviy ijtimoiy harakatga aylantirish, mazkur harakat nafaqat ushbu Dastur doirasida cheklanib qolmasdan, mamlakat ijtimoiy munosabatlar tizimida o‘zining doimiy o‘rniga ega bo‘lishini ta’minlashga qaratilgan barcha zarur shart-sharoitlarni yaratsin;
ikki hafta muddatda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, xo‘jalik birlashmalari tomonidan har bir aholi punkti, tuman, shahar va idoralar bo‘yicha «Homiylar va shifokorlar yili» hududiy va tarmoq dasturlari ishlab chiqilib, qabul qilinishini ta’minlasin;
davlat boshqaruvi respublika va hududiy organlari hamda jamoat tashkilotlari darajasida ushbu Dastur bo‘limlari hamda bandlarini to‘liq va so‘zsiz bajarish bo‘yicha ishlarning muvofiqlashtirilishini tashkil qilsin hamda Dasturga kiritilgan tadbirlarning bajarilishi ustidan tizimli nazorat o‘rnatsin.
5. O‘zbekiston matbuot va axborot agentligi, O‘zbekiston Milliy axborot agentligi, Milliy teleradiokompaniya, ommaviy axborot vositalari «Homiylar va shifokorlar yili» dasturining maqsadi va ahamiyatini ochib berish yuzasidan keng tushuntirish ishlari olib borilishini, unda nazarda tutilgan tadbirlarning bajarilishi, shu jumladan, aholi o‘rtasida mehr-muruvvat, o‘zaro yordam va homiylik g‘oyalari mustahkamlanishiga alohida e’tibor qaratgan holda, savobli ishlarni amalga oshirayotgan fuqarolar, mahallalar, korxona va tashkilotlar jamoalarining qo‘shayotgan hissalari muntazam yoritib borilishini ta’minlasin.
6. Mazkur qarorning ijrosini nazorat qilish O‘zbekiston Respublikasining Bosh vaziri Sh.M. Mirziyoev zimmasiga yuklansin.

O‘zbekiston Respublikasi Prezidenti I. KARIMOV

Toshkent sh.,
2006 yil 23 yanvar,
PQ-266-son

Ko'rishlar soni(58)