Informatika o`qitish metodikasi kafedrasi

A.Qodiriy nomidagi Jizzax davlat pedagogika instituti 1974 yilda tashkil topgan bo‘lib, u qo‘riq Jizzax vohasida malakali o‘qituvchi kadrlar tayyorlash uchun tayanch oliy o‘quv yurti hisoblanadi. Uning moddiy-texnik bazasini har tomonlama rivojlantirish va mustahkamlash, o‘quv jarayoniga o‘qitishning texnik vositalarini keng joriy etish maqsadida 1978 yilda umumiy fizika kafedrasi bazasida “O‘qitishning texnik vositalari” kafedrasi tashkil etilgan (birinchi kafedra mudiri, p.f.n. Oblaqulov Sh.). Natijada institutda yangi o‘qitish tizimi, ya’ni media-texnologiya-audiovizual vositalar keltirilib o‘quv jarayoniga joriy etila boshlangan. Qisqa davr mobaynida institutda yopiq o‘quv telestudiyasi tashkil etilgan. Shuningdek, kafedra tomonidan Jizzax shahridagi 10, 16, 17 kabi umumiy o‘rta ta’lim maktablarida ham yopiq telestudiyalar tashkil etilgan. Ushbu kafedraning tashabbusi (Oblaqulov Sh., To‘raqulov X.A., Ergashev E., Inatov X., Fayzullayev A., Xaitov F.) va institutning o‘sha davrdagi rektori, prof. B.O‘rinboyevning bevosita rahbarligida institutga birinchi elektron hisoblash mashinasini (Minsk-22) 1983 yilda To‘raqulov X.A. va Xaitov F.N. lar Toshkent davlat universitetidan (hozirgi O‘zbekiston milliy universiteti) olib kelib o‘rnatgan va o‘quv jarayonida foydalanila boshlagan. Bu davrda elektron hisoblash mashinasidan asosan amaliy va laboratoriya mashg‘ulotlarida hisob-kitob ishlarini bajarish uchungina foydalanilgan. Jizzax viloyatida bu davrda birorta ham elektron hisoblash mashinasi yo‘q edi. Bu Jizzax viloyati va shahri uchun ham o‘sha davrdagi katta yangilik bo‘lgan.

XX asrning 70- yillari oxiri va 80- yillarida Elektron hisoblash mashinalarining xalq xo‘jaligining turli sohalarida keng qo‘llanilishi ko‘pchilik mutaxassislarning fikrlash tarzi va ish usulini jiddiy o‘zgartirdi va bunday mutaxassislarga e’tibor sezilarli darajada ortdi. Ma’lumki, har qanday mutaxassisni tayyorlash maktabdan boshlanadi. Shuning uchun ham umumiy o‘rta ta’lim maktablarining 9- va 10-sinflarda yangi umumiy ta’lim predmeti, ya’ni “Informatika va hisoblash texnikasi asoslari” predmetini joriy etish masalasi kun tartibiga qo‘yildi. Bu maktab islohotining asosiy masalalaridan biri, ya’ni “o‘quvchilarni zamonaviy hisoblash texnikasidan foydalanish bo‘yicha bilim, ko‘nikma va malakalar bilan qurollantirish, o‘quv jarayonida elektron hisoblash mashinalarining (xozirgi kompyuterlarning) keng qo‘llanilishini ta’minlashning” boshlanishi edi.

1985 yildan boshlab barcha umumiy o‘rta ta’lim muassasalariga “Informatika va hisoblash texnikasi asoslari” ning majburiy fan sifatida kiritilishi tufayli bu sohada mutaxassis tayyorlash maqsadida institutda “Matematika, informatika va hisoblash texnikasi” mutaxassisligi bo‘yicha o‘qituvchi kadrlar tayyorlash yo‘lga qo‘yildi va bu yo‘nalishda o‘quv jarayonini tashkil etish maqsadida O‘zbekiston Respublikasi xalq ta’limi vazirligining (sobiq O‘zbekiston maorif ministrligi) buyrug‘i asosida 1987 yilda institutning “Oliy matematika” va “O‘qitishning texnik vositalari” kafedralari bazasida “Informatika va hisoblash texnikasi asoslari” kafedrasi tashkil etildi.

Bu borada, kafedra o‘qituvchilari (Xaitov F.N., Yusupov R.M.) ham o‘zlarining bu sohadagi bilimlarini chuqurlashtirish uchun Novosibirskiy, Moskva va Ufa kabi shaharlardagi yirik hisoblash markazlarida, O‘zbekiston Fanlar Akademiyasi “Kibernetika” ilmiy-ishlab chiqarish birlashmasida stajirovka o‘tab qaytishdilar. Kafedrada o‘qituvchi vazifasida ishlab kelayotgan Xaitov F.N. 1990 yilda, Yusupov R.M. 1995 yilda “Kibernetika” ilmiy-ishlab chiqarish birlashmasi qoshidagi ixtisoslashgan kengashda texnika fanlari ilmiy darajasini olish uchun nomzodlik dissertatsiyalarini himoya qildilar.

1989-1991 yillar mobaynida esa institutga “Korvet”, “Pravets”, “Osiyo” kabi hisoblash texnikasi sinflari keltirilib o‘rnatildi va o‘quv jarayonida foydalanila boshlandi.

 1991 yilda Respublikamiz mustaqilligi e’lon qilingan davrdan boshlab kafedra hayotida tub burilishlar boshlandi. Mustaqillik esa birinchi navbatda “Barkamol avlod orzusi” ni ro‘yobga chiqarish masalasini qo‘ydi.

 Mustaqillik – bu millat orzusi, o‘z rivojlanish yo‘lini o‘zi tanlash huquqi. Mustaqillik – bu o‘ziga beklik. Mustaqillik – bu orzular ro‘yobi. O‘zbekiston o‘z orzularini ro‘yobga chiqarish uchun imkoniyatga ega bo‘ldi, harakat boshlandi. Biroq, barkamol avlod orzusi bo‘yicha davlatning qonun darajasidagi maxsus dasturi hali beri ishlanmasligi mumkin edi. Sobiq ittifoqdan ajralgan boshqa mamlakatlar kabi faqat bugun haqida o‘ylash, bugunning muammolariga o‘ralashib qolish holati ham bo‘lishi mumkin edi. Baxtimizga millatning rivojlangan davlatlar qatoriga olib chiqish uchun o‘z yo‘liga ega bo‘lgan rahbar – Islom Karimov O‘zbekiston Prezidenti etib saylandi. Uning kadrlar tayyorlash milliy dasturi borasida avvaldan o‘z rejalari- orzulari bor edi. Ana shu rejalari-orzularidan biri sifatida 1992 yilda “Ta’lim to‘g‘risida” gi birinchi Qonun qabul qilindi. Bu Qonun eng avvalo O‘zbekiston ta’limida ilgari erishilgan muvaffaqiyotlarni saqlab qolishga xizmat qildi. Shuningdek, eski tizimdan yangisiga o‘tishda ko‘prik vazifasini ham o‘tadi. Sir emaski, 1992 yilga qadar biz asosan rus tilidan tarjima qilingan o‘quv adabiyotlardan foydalanar edik. Qabul qilingan Qonun esa ta’lim muassasalari uchun o‘zbek tilida yozilgan yangi avlod o‘quv adabiyotlarini tayyorlash masalasini kun tartibiga qo‘ydi. Ana shu davrda kafedra a’zolari umumiy o‘rta ta’lim maktablari uchun informatika bo‘yicha o‘zbek tilidagi yangi o‘quv adabiyotlarini yaratishda faol ishtirok etdi. Jumladan, dots. Yusupov R.M. umumiy o‘rta ta’lim maktablari 8 va 9 sinf o‘quvchilari uchun o‘zbek tilidagi birinchi “Informatika va hisoblash texnikasi asoslari” darsliklarini tayyorlashda mualliflar tarkibida faol ishtirok etdi. Mazkur darslik 1994 yilda O‘zbekiston Respublikasi xalq ta’limi vazirligi tomonidan maktablarga tavsiya etildi.

1994 yildan boshlab umumiy o‘rta ta’lim maktablarida “Informatika va hisoblash texnikasi asoslari” fanini o‘qitishda yangicha dastur va yangi darslik asosida o‘qitila boshlandi. Bu esa o‘z navbatida maktab informatika o‘qituvchilariga ma’lum qiyinchiliklar paydo qildi. Kafedra navbatdagi asosiy masala sifatida o‘z oldiga maktab informatika o‘qituvchilari uchun informatika va hisoblash texnikasini o‘rganishga oid ommabop uslubiy va metodik qo‘llanmalar tayyorlash vazifasini belgilab oldilar. Qisqa davr mobaynida “Informatikaga kirish” (1994 yil), “BYeYSIK tilini o‘rganamiz” (1995 yil) va “Hisoblash texnikasi va algoritmlash” (1996 yil) kabi jami 20 bosma taboqdan iborat metodik qo‘llanma va ko‘rsatmalar tayyorlanib o‘quv jarayonida foydalanishga topshirildi.

O‘zbekiston Respublikasi Oliy Majlisning IX sessiyasida O‘zbekiston Respublikasining Birinchi Prezidenti Islom Karimov “Barkamol avlod – O‘zbekiston taraqqiyotining poydevori” nutqida ta’lim tizimida erishilgan muvaffaqiyat va kamchiliklarni ob’ektiv tahlil qilib, kadrlar tayyorlashda islohotga ehtiyoj borligini isbotlab berdilar. Ushbu sessiyada so‘zlagan nutqlarida Respublikamizning istiqbolli rivojlanish rejalari, uning ustuvor yo‘nalishlari va dolzarb masalalari hamda ularni hal qilishning original yo‘llarini ko‘rsatib berdi. Shunisi diqqatga sazavorki, ta’lim-tarbiya tizimini rivojlantirish istiqbollariga alohida e’tibor berib, uning maqsadi hamda amalga oshirish yo‘llarini atroflicha yoritib berdi. Shuningdek, ushbu sessiyada yangi tahrirdagi “Ta’lim to‘g‘risida” gi Qonun va “Kadrlar tayyorlash milliy dasturi” qabul qilindi va hayotga tadbiq etila boshlandi. Respublika Prezidenti va Hukumat tomonidan muhim Farmonlar va Qarorlar qabul qilindi hamda ta’limni tubdan isloh qilish davri boshlandi.

 1998 yildan boshlab kafedraning moddiy texnik bazasi tubdan yangilana boshlandi. Zamon bilan hamnafas holda IVM rusumidagi kompyuterlar sinfi olib kelinib o‘rnatildi va o‘quv jarayonida to‘liq foydalanish yo‘lga qo‘yildi. Chunki, bu vaqtga kelib jahon bozorini ushbu rusumdagi kompyuterlar to‘liq egallagan edi. Kafedra qoshida IVM kompyuterlari bilan jihozlangan xonalar tashkil etila boshlandi. Kompyuterlar parki son jihatdan kengaya bordi. O‘rtacha 18-20 talabaga 1 ta kompyuter to‘g‘ri kela boshladi. Bu davrga kelib institutdagi barcha ta’lim yo‘nalishlarida informatika va axborot texnologiyalarini o‘qitish yo‘lga qo‘yildi. Kafedraning o‘qituvchilari soni ham 15 kishiga yetdi. 2005 yilga kelib kafedraning nomi “Informatika va axborot texnologiyasi” deb atala boshladi. Bu davrda kafedrani dots. E.G‘aniyev boshqardi. Kafedra o‘qituvchilari E.Shukurov (2005-2006 yy.), A.Sattarov (2007-2008 yy.) lar zamonaviy dasturlash tillarini chuqur o‘zlashtirish maqsadida Rossiya Federatsiyasining “Dubna” shahridagi “Birlashgan yadro tadqiqotlar” instituti qoshidagi “Hisoblash markazi”da stajirovkada bo‘ldi. O‘qituvchi D.Jomurodov (2007-2011) yillar shu markazda aspiranturada o‘qidi. Bu esa kafedraning hamkorlik borasidagi imkoniyatlarini yanada kengaytirishga zamin yaratdi. Ta’lim sohasini tubdan isloh qilish, jahon andozalari talablariga javob beradigan kadrlar tayyorlash borasida kafedra a’zolari o‘z imkoniyatlari doirasida faol ishtirok etib kelmoqda.

Dots. E.G‘aniyev O‘zbekiston Respublikasi Prezidentining «Iste’dod» jamg‘armasining grant sovrindorlari tanlovi g‘olibi sifatida 2000 yili Parijdagi Weisoll akademiyasida, 2004 yili Koreyaning Yeungnam universitetida, o‘qituvchi D.Jomurodov 2005 yilda Germaniyaning ikkita universitetida malaka oshirdilar, o‘qituvchi X.Tangirov esa 2011 yilda tanlov g‘olibi bo‘lib, Xorijiy mamlakatlarning ta’lim va ilmiy muassasalarida (Rossiyaning Moskva davlat universitetida) qisqa muddatli malaka oshirish va tajriba almashish huquqiga ega bo‘ldi. Ular axborot texnologiyalari, masofadan o‘qitish va iqtisodiy ta’lim muammolariga yo‘naltirilgan 10 ta ma’ruza-taqdimot o‘tkazdilar. Bular o‘z navbatida xorijiy mamlakatlarning amaliy tajribalarning ijobiy tomonlarini o‘rganish va shu asosda o‘zimizning milliy-ma’naviy mafkuramizga mos qilib yaratilgan ta’lim tizimi asosida ishlarimizni yo‘lga qo‘yishimiz uchun poydevor vazifasini o‘tay boshladi.

Kafedra a’zolarining ta’limni isloh qilish borasidagi xizmatlari esa Hukumatimiz tomonidan munosib baholanib kelinmoqda.

Kafedra dotsenti E.G‘aniyev 2001 yilda O‘zbekiston Respublikasi Prezidenti huzuridagi “Iste’dod” jamg‘armasi tomonidan e’lon qilingan tanlovda “Yillining eng yaxshi o‘qituvchisi” nominatsiyasi bo‘yicha g‘olib bo‘lgan va 1-darajali diplom hamda esdalik sovg‘alar bilan taqdirlangan. 2002 yilda O‘zbekiston Respublikasi xalq ta’limi vazirligining buyrug‘iga ko‘ra “O‘zbekiston Respublikasi xalq ta’limi a’lochisi ko‘krak nishoni” bilan taqdirlangan. 2003 yilda O‘zbekiston Respublikasi Prezidentining Farmoniga ko‘ra “Shuhrat” medali bilan mukofotlangan. 2008 yilda «Uzluksiz ta’lim tizimini boshqaruvini modellashtirishning pedagogik asoslari» mavzuidagi ilmiy ishlanmasi «O‘zbekiston Madaniyati va san’ati forumi» jamg‘armasining pedagogik grantlar tanlovida g‘olib bo‘lgan.

 Kafedra dotsenti R.M. Yusupov esa 2002 yilda O‘zbekiston Respublikasi huzuridagi “Iste’dod” jamg‘armasi tomonidan e’lon qilingan tanlovda “Yilning eng yaxshi murabbiysi” nominatsiyasi bo‘yicha g‘olib deb topilgan va 1-darajali diplom bilan taqdirlangan. 2003 yilda O‘zbekiston Respublikasi xalq ta’limi vazirining buyrug‘iga ko‘ra “O‘zbekiston Respublikasi xalq ta’limi a’lochisi ko‘krak nishoni” bilan taqdirlangan.

Kafedra professor-o‘qituvchilari tomonidan hozirgi kunga qadar xorijiy (Rossiya, AQSh, Fransiya, Koreya, Germaniya, Ukraina, Belorussiya kabi mamlakatlarning) va Respublikamizning nufuzli ilmiy va ilmiy-uslubiy jurnallarida (“Informatika va pedagogika muammolari”, “INFOCOM/UZ”, “Xalq ta’limi”, “Uzluksiz ta’lim”, “Fizika, matematika va informatika”, “Kasb-hunar ta’limi”, “Maktab va hayot”, “Pedagogika”, “Ta’lim texnologiyalari” kabi ilmiy-uslubiy jurnallarda) 350 ga yaqin ilmiy, ilmiy-uslubiy maqolalar, 10 monografiya, 60 ta o‘quv-uslubiy qo‘llanmalar, 125 ta o‘quv va metodik qo‘llanmalar, tavsiyanoma va ko‘rsatmalar chop etilib o‘quv-tarbiya jarayonida, ishlab chiqarishning boshqa sohalarida keng qo‘llanilmoqda.

Jumladan, “Informatikadan sinfdan tashqari ishlar” (2001 y.), «Zamonaviy kompyuterlarni boshqarish sirlari» (2003 y.) «XXI asrda Malayziya ta’lim tizimi istiqbollari» (2004 y.), «Hududiy oliy ta’lim tizimini takomillashtirish istiqbollari» (2004 y.), «Ta’lim menejmenti», “Umumta’lim maktablarida algebra kursini o‘rganishda o‘qitishning elektron vositalaridan foydalanish metodikasi” (2013 y.), “Matematika fanidan elektron o‘quv qo‘llanma va uni yaratishning nazariy-amaliy negizlari” (2013 y.), “Axborot-kommunikatsion ta’lim muhitida matematikani o‘qitishning nazariy-uslubiy asoslari” (2014 y.), “Umumiy o‘rta ta’lim maktablari algebra kursi bo‘yicha o‘qitishning elektron vositalarini yaratish va ulardan foydalanish metodikasi” (2015 y.), “Algoritmlash va dasturlash tillari fanidan amaliy mashg‘ulotlar uchun topshiriqlar va ularni bajarish bo‘yicha uslubiy ko‘rsatmalar” (2015 y.), “S++ dasturlash tili” (2015 y.), “Pedagogning elektron portfoliosini shakllantirish va unda ishlash bo‘yicha metodik tavsiyalar” (2016 y.), “MOODLE – masofaviy ta’lim tizimida fanlardan elektron o‘quv kurslarini tashkil etish bo‘yicha metodik ko‘rsatmalar” “O‘qitishning elektron vositalarini yaratish texnologiyasi” (2017 y.) kabi monografiya, o‘quv va o‘quv-uslubiy qo‘llanmalar, metodik tavsiya va ko‘rsatmalari mamlakatimiz umumiy o‘rta ta’lim maktablari va oliy ta’lim muassasalarida keng qo‘llanilmoqda.

Shuningdek, kafedra professor-o‘qituvchilari (Xaitov F.N., Yusupov R.M., Tangirov X.E., Sattarov A., Shukurov E., Begbo‘tayev A., Jumaboyev S.) tomonidan dasturiy mahsulotlar uchun O‘zbekiston Respublikasi Intellektual mulk agentligining 10 ta patent guvohnomasi olingan.

Kafedra o‘qituvchisi X.Tangirov O‘zbekiston kasaba uyushmalari Federatsiyasi Kengashi tomonidan o‘tkazilgan “Yilning eng faol yosh mutaxassisi” tanlovida faol ishtirok etib, Jizzax viloyati bo‘yicha 2014 yil “Eng faol yosh dasturchi” nominatsiyasida faxrli 1-o‘rin, 2015 yil “Eng faol yosh olim” nominatsiyasida faxrli 2-o‘rinni egallagan. 2015 yilgi Innovatsion g‘oyalar, texnologiyalar va loyihalar VIII Respublika hamda 2017 yilgi X Respublika yarmarkasiga tayyorgarlik doirasida o‘tkazilgan “Innovatsion ishlanmalar ko‘rgazmasi”da qatnashgan va “Eng yaxshi g‘oya muallifi” diplomini qo‘lga kiritgan. 2016 yil O‘zbekiston Respublikasi Oliy va o‘rta maxsus ta’lim vazirligi tomonidan o‘tkazilgan “Oliy ta’lim muassasasining eng yaxshi pedagogi” respublika tanlovida faol ishtirok etgan va OTM bosqichida “Eng yaxshi pedagog-tadqiqotchi” nominatsiyasi bo‘yicha faxrli 1-o‘rinni qo‘lga kiritib, respublika bosqichida ishtirok etgan.

Kafedra Nizomiy nomli Toshkent davlat pedagogika universiteti, T.N. Qori-Niyoziy nomidagi O‘zbekiston pedagogika fanlari ilmiy-tadqiqot instituti, O‘zbekiston milliy universiteti, Toshkent axborot texnologiyalari universiteti, Samarqand davlat universitetlari bilan hamkorlik shartnomasi asosida informatika ta’limining uzluksizligi va uzviyligini ta’minlash, informatika bo‘yicha yangi avlod o‘quv adabiyotlarini yaratish, informatika ta’lim jarayoniga yangi pedagogik texnologiyalar va zamonaviy axborot-kommunikatsiya texnologiyalarini qo‘llash kabi muammolar bo‘yicha ilmiy-tadqiqot ishlari olib bormoqda. Kafedra o‘qituvchilaridan Sh.Alishev Jizzax politexnika institutida katta ilmiy xodim-izlanuvchi, X.Tangirov, S.Jumaboyevlar esa T.N. Qori Niyoziy nomidagi O‘zbekiston pedagogika fanlari ilmiy-tadqiqot institutida mustaqil izlanuvchi sifatida ilmiy-tadqiqot ishlarini olib bormoqda.

Hozirgi kunda kafedra qoshida 15 ta zamonaviy kompyuter texnikasi va texnik vositalar bilan jihozlangan kompyuter xonalari mavjud bo‘lib, informatika va axborot texnologiyalari bo‘yicha amaliy va laboratoriya mashg‘ulotlari asosan shu xonalarda zamonaviy ta’lim texnologiyalari va vositalari asosida olib borilmoqda. O‘rtacha 10-13 kishiga bitta kompyuter to‘g‘ri kelmoqda. Xonalar to‘liq Internet tarmog‘iga ulangan bo‘lib, talabalar uchun Internet manbalaridan foydalanishga to‘liq shart-sharoit yaratilgan.

Institutning Internet tarmog‘idagi dastlabki (www.jspi.uz) saytini yaratishda va faoliyat yuritishida 2004-2010 yillar davomida kafedra o‘qituvchilari (E.Shukurov, X.Tangirov) jonbozlik ko‘rsatishgan. O‘qituvchi X.Tangirov tomonidan maktab matematika (algebra, geometriya) darsliklari asosida elektron o‘quv qo‘llanma, elektron ishlanmalar yaratilgan. 2009 yildan 7-sinf algebra darsligi elektron o‘quv qo‘llanmasining internet versiyasi yaratilib, undan ko‘plab maktablar www.algebra7.dars.uz sayti orqali foydalanishgan. Bugungi kunda ular yangilanib, boshqa sinflarning ham Internet versiyasi yaratilgan va internet tarmog‘iga (www.edarslik.uz saytiga) joylashtirilgan.

Kafedra qoshidagi “Yosh dasturchilar” to‘garagi doimiy ravishda faoliyat ko‘rsatib kelmoqda hamda iqtidorli talabalar bilan ishlash yo‘lga qo‘yilgan. To‘garak a’zolaridan iborat jamoa Toshkent shahrida o‘tkaziladigan “Kompyuterda dasturlashtirish bo‘yicha jahon chempionatining Middle Asia hududi” doirasida chorak finalda doimiy ravishda qatnashishgan, 2015 yil yarim finalgacha chiqqan va O‘zbekiston Respublikasi Oliy o‘rta maxsus vazirligining faxriy yorliqlari va esdalik sovg‘alari bilan mukofotlangan. Iqtidorli talabalardan to‘garak a’zolari Kenjayev G‘iyos, To‘xtayeva Dilrabo, Abduxakimov Rashidlar “Yurt kelajagi” iqtidorli yoshlar Respublika ko‘rik-tanlovi viloyat bosqichida g‘olib bo‘lib, Respublika final bosqichida munosib ishtirok etishgan. Jabborov Olim 2016 yilda Respublika fan olimpiadasida “Kompyuter grafikasi” fanidan qatnashib, 4-o‘rinni egallagan va eng faol talaba sifatida sertifikat bilan taqdirlangan. Dustqulov Jahongir 2016 yilda “Innovatsion ishlanmalar ko‘rgazmasi” yarmarkasida qatnashib “Eng faol talaba” diplomini qo‘lga kiritgan.

Kafedra a’zolari (F.N. Xaitov, R.M. Yusupov, X.E.Tangirov) ilmiy-tadqiqot loyihalarida ham ishtirok etib kelishgan, xususan, Xalq ta’limi vazirligi tasarrufidagi ta’lim muassasalarida 2009-2011 yillarga mo‘ljallangan “ITD–4. Yosh avlodni tarixiy, milliy va umuminsoniy qadriyatlar asosida munosib tarbiyalash, ta’lim tarbiya tizimini rivojlantirish, uzluksiz ta’lim tizimida yuqori malakali, shuningdek boshqaruv kadrlarni tayyorlashni takomillashtirish” va 2012-2014 yillarga mo‘ljallangan “ITD–1. Jamiyatni ma’naviy-axloqiy va madaniy rivojlanishi, ma’naviy qadriyatlar, milliy g‘oya, madaniy me’ros, o‘zbek xalqi va davlatchilik tarixini hamda ta’limning uzviylik va uzluksizligini, barkamol avlod tarbiyasini tadqiq etish” nomli amaliy tadqiqotlar davlat ilmiy-texnik dasturlari doirasida, jumladan, A1-XT-0-14297 raqamli «Axborot-kommunikatsion ta’lim muhitida matematikani o‘qitishni tashkil etishning ilmiy-uslubiy asoslarini yaratish» mavzularidagi ilmiy-amaliy tadqiqot loyihalari doirasida loyiha ijrochisi sifatida faoliyat olib borishgan.

2011-2017 yillar davomida “Informatika va axborot texnologiyasi” kafedrasini t.f.n., dots. R.M. Yusupov boshqardi.

2012 yilda institutda “Informatika o‘qitish metodikasi” yo‘nalishi ochildi va dastlabki 50 ta talaba o‘qishga qabul qilindi. 2016 yilda, ya’ni Mustaqilligimizning 25 yilligi arafasida ular ushbu yo‘nalishning birinchi qaldirg‘ochlari bo‘ldilar. Hozir kunda informatika o‘qitish metodikasi yo‘nalishida 400 dan oshiq talaba tahsil olmoqda, kafedramizda esa 35 ta professor-o‘qituvchi institut talabalariga dars bermoqdalar.

2015 yil martdan boshlab kafedra “Informatika o‘qitish metodikasi” nomi bilan atalmoqda.

2017 yildan “Informatika o‘qitish metodikasi” kafedrasini t.f.n., dots. F.N. Xaitov boshqarmoqda.

                                                F.N. Xaitov,  R.M. Yusupov, X.E. Tangirov

Ko'rishlar soni(1 338)